خادمِ حرمین شریفین شاہ عبد اللہ بن عبد العزیز کا مشکور ہوں کہ انہوں نے عبد العزیز الغدیر جیسا سعودی سفیر پاکستان کو دیا، صوبائی وزیرِصنعت و تجارت رؤف صدیقی

مورخہ 27 مئی 2014

صوبائی وزیرِ صنعت و تجارت رؤف صدیقی نے سعودی کونسلیٹ کی جانب سے منعقد کی گئی سعودی سفیرعبد العزیز الغدیر کی الوداعی تقریب میں شرکت کی۔ رؤف صدیقی نے تقریب سے خطاب کرتے ہوئے کہا کہ میں خادمِ حرمین شریفین شاہ عبد اللہ بن عبد العزیز کا مشکور ہوں کہ انہوں نے عبد العزیز الغدیر جیسا سعودی سفیر پاکستان کو دیا۔سعودی سفیر عبد العزیز الغدیر کی خدمات پاکستانی عوام کیلئے ہمیشہ بہترین الفاظ میں یاد رکھی جائیں گی کہ وہ پاکستان میں بہترین اور تاریخی یادیں چھوڑ کر جا رہے ہیں۔ پاکستان میں زلزلہ آیا تو عبد العزیز الغدیر پہاڑوں پر نظر آئے اور سیلاب آیا تو ٹھٹہ کے پانی میں مصیبت کے مارے پاکستانیوں کے ساتھ شانہ بشانہ کھڑے رہے۔رؤف صدیقی نے مزید کہا کہ خادمِ حرمین شریفین شاہ عبد اللہ بن عبد العزیز کی جانب سے مسلم امت کے اتحاد کیلئے کی جانے والی کوششیں قابلِ تحسین ہیں۔ میں حکومتِ سندھ اور پاکستان کی جانب سے سعودی سفیر عبد العزیز الغدیر کو زبردست خراجِ تحسین پیش کرتا ہوں۔ موجودہ سعودی سفیر ڈاکٹر فالح الرّحیلی کو سفارت کا منصب سنبھالنے پر مبارکباد پیش کرتا ہوں۔