ایم کیوایم کے زیراہتمام تبت سینٹر پر الطاف حسین سے اظہار یکجہتی کیلئے ملک کی تاریخ کی سب سے بڑی تاریخی اور بے مثال ریلی نکالی گئی

کراچی ۔۔۔25،مئی 2014ء 

متحدہ قومی موومنٹ کے زیراہتمام اتوار کے روز ایم اے جناح روڈ تبت سینٹر کے مقام پر بانی و قائد تحریک جناب الطاف حسین سے اظہار یکجہتی کیلئے فقید المثال اور ملک کی تاریخ کی سب سے بڑی تاریخی اور بے مثال ریلی نکالی گئی جس میں لاکھوں کی تعداد میں کراچی سمیت سندھ بھر کے عوام و کارکنان ، مختلف قومیتوں اور مذہبی اقلیتوں کے افراد نے شرکت کی ۔ ایم کیوایم کے رہنماؤں کے خطاب کے دوران ریلی کے شرکاء تبت سینٹر پر قائم اسٹیج کے مقام سے تین ہٹی تک موجود تھے جبکہ اطراف کے علاقوں سے آنے والی سڑکوں پر بھی ہر جانب سر ہی سر دکھائی دے رہے تھے اور انسانوں کا ٹھاٹھے مارتا ہوا سمندر اپنے قائد جناب الطا ف حسین سے اظہار یکجہتی تپتی دھوپ اور شدید گرمی میں دوپہر سے ریلی کے اختتام تک انتہائی نظم و ضبط کے ساتھ موجود رہا ۔جناب الطاف حسین سے اظہار یکجہتی کیلئے نکالی گئی ریلی میں شرکت کیلئے قافلے اور جلوس کراچی کے مختلف علاقوں کے علاوہ اندرون سندھ سے دوپہر کو ہی پہنچنا شروع ہوگئے تھے ۔قافلوں اور جلوسوں کے شرکاء گاڑیوں ، بسوں ، منی بسوں ، کاروں ، جیپوں اور دیگر سواریوں میں سوار تھے جنہوں نے اپنے ہاتھوں میں پلے کارڈ، ایم کیوایم اور پاکستان کے پرچم اٹھا رکھے تھے ۔ ریلی کے شرکاء سندھی ، پنجابی ، پختون ،بلوچ، سرائیکی اور دیگر زبانوں میں نعرے لگا رہے تھے اور اپنی روایتی لباس میں ملبوس تھے ۔ریلی کے انتظامات کی نگرانی کی ایم کیوایم کی رابطہ کمیٹی کے اراکین پنڈال میں موجود رہ کر کرتے رہے اور ریلی کے لئے قائم کی گئی کمیٹیوں کے اراکین کو ہدایات دیتے رہے ، شدید دھوپ اور گرمی کے باوجود ریلی تبت سینٹر اور اس کے اطراف کے علاقوں میں ایم کیوایم کے سینکڑوں کارکنان مختلف ڈیوٹیاں سرانجام دیتے رہے ۔ ریلی کے شرکاء جناب الطاف حسین سے اظہار یکجہتی اور محبت پر مبنی نعرے پرجوش انداز میں لگا رہے تھے اس موقع پر خواتین کا جوش و خروش بھی قابل دید تھا ۔ ریلی میں مسلم امہ کے مختلف مسالک کے جید علمائے کرام ،کرسچن ، ہنداورسکھ مذاہب کے رہنماؤں سمیت معروف کالم نگاروں ، تاجر انجمنوں کے عہدیداران نے بھی شرکت کی اور جناب الطاف حسین سے دلی یکجہتی کااظہار کیا ۔ ریلی کے سلسلے میں تبت سینٹر پر زبردست انتظامات کئے گئے تھے اور تبت سینٹر کے بالکل سامنے کنٹینروں کی مدد سے دومنزلہ اسٹیج بنایا گیا تھا جبکہ تبت سینٹر سے مزار قائد اور اطراف کے علاقوں کو ایم کیوایم کے پرچموں اور قائد تحریک جناب الطاف حسین سے اظہار یکجہتی کیلئے لگائے گئے بینروں سے سجایا گیا تھا ۔ ریلی کے شرکاء کی سپر ہائی وے سے رہنمائی کیلئے بھی خصوصی انتظامات کئے گئے تھے اور اس سلسلے میں قائم کی گئی کمیٹیوں کے اراکین نے قافلوں اور جلوسوں کی رہنمائی کی جس کے باعث ٹریفک میں خلل واقع نہیں ہوا ۔ ریلی کے شرکاء سے ایم کیوایم کی رابطہ کمیٹی کے ڈپٹی کنوینر ڈاکٹر خالد مقبول صدیقی ، رابطہ کمیٹی کے رکن ڈاکٹر فاروق ستار ،حیدر عباس رضوی ، معروف کالم نگار مقتدا منصور ، آغا مسعود ، سینٹر و ممتا ز عالم دین مولانا تنویر الحق تھانوی ، صوبائی وزرا رؤف صدیقی ، فیصل سبزواری ، کرسچن مذہبی رہنما صادق ڈینیل ، ہندو برادری کی سماجی شخصیت منگلا شرما ، حق پرست رکن سندھ اسمبلی وقار حسین شاہ اور دیگر نے خطاب کیا ۔اپنے خطاب میں ایم کیوایم کے رہنماؤں نے برطانیہ میں جناب الطاف حسین کیلئے مشکلات اور رکاوٹیں کھڑی کرنے پر شدید رد عمل کااظہار کیا اوربرطانیہ کے وزیراعظم ڈیوڈ کیمرون اور برطانوی حکومت سے اہم سوالات کئے اور ان کے جوابات طلب کئے ۔ پنڈال میں ایک موقع پر جناب الطاف حسین سے اظہار یکجہتی کیلئے اے پی ایم ایس او کی جانب سے تیار کیا گیا خصوصی ترانہ کی سی ڈی بجائی گئی جس کا شرکاء نے کھڑے ہوکر ساتھ دیا اور جناب الطاف حسین کے حق میں زبردست نعرے لگائے ۔