متحدہ قومی موومنٹ کی رابطہ کمیٹی کا طویل اجلاس۔ سیکٹروں، زونوں کے کارکنوں بشمول خواتین کارکنوں کی جانب سے بھیجےگئے معافی ناموں پرتفصیلی غور
معافی نامے قبول کرنے اور بحیثیت کارکن تحریک میں دوبارہ شامل کرنے کا فیصلہ
بانی وقائد جناب الطاف حسین نے رابطہ کمیٹی کے اس فیصلے کی توثیق کردی
معاف کئےجانےوالےکارکنان اپنے یونٹوں اور سیکٹروں کےوفاپرست ساتھیوں سےفی الفور رابطہ کریں۔قائدتحریک الطاف حسین کی ہدایت
لندن……25فروری 2026ء
متحدہ قومی موومنٹ کی رابطہ کمیٹی کا ایک اجلاس ہواجس میں مختلف سیکٹروں اورزونوں کے کارکنوں بشمول خواتین کارکنوں کی جانب سے بھیجے گئے معافی ناموں پر تفصیلی غورکیا گیا۔ یہ وہ کارکنان ہیں جو حالات کےجبریا اپنی مجبوریوں کی بناء پر تحریک سے غیرفعال ہوگئے تھے، تحریک سے دورہوگئےتھےیا وقتی طورپر کہیں چلے گئے تھے اوراب انہوں نے اپنے عمل پر شرمندگی اورندامت کا اظہارکرتےہوئے بانی وقائد جناب الطاف حسین کے نام معافی نامے تحریک کے مرکزکو بھیجے ہیں جن میں کراچی کے مختلف سیکٹروں، حیدرآباد اور دیگرزونوں سے تعلق رکھنے والے متعدد کارکنان بشمول خواتین کارکنان شامل ہیں۔ رابطہ کمیٹی نے معافی نامے بھیجنے والے کارکنوں کوپہلے کچھ عرصہ گھر بیٹھنے کی ہدایت کی تھی اوراس دوران ان کے طرزعمل کاجائزہ لیا گیا۔اب رابطہ کمیٹی نےاپنے طویل اجلاس کےبعد متفقہ طورپر یہ فیصلہ کیا کہ یہ ساتھی اپنی غلطیوں پر نہ صرف نادم ہیں بلکہ اپنی غلطیوں کاازالہ بھی کرنا چاہتے ہیں لہٰذا انہیں ایک اورموقع دیاجائے کہ وہ بحیثیت کارکن اپنے عمل سے ثابت کریں کہ انہوں نے جو معافی نامے لکھے ہیں وہ اللہ تعالیٰ کو حاضروناظرجان کرلکھے ہیں۔ رابطہ کمیٹی نےتفصیلی غوروخوص کے بعد ان ساتھیوں کے معافی نامے قبول کرنے اورانہیں بحیثیت کارکن تحریک میں دوبارہ شامل کرنےکا فیصلہ کیا۔رابطہ کمیٹی نے اپنے بیان میں کہا کہ حالات کے پیش نظر معافی نامے بھیجنے والے ساتھیوں کے نام ان کے تحفظ کی خاطر جاری نہیں کئے جارہے ہیں۔رابطہ کمیٹی نے معافی نامے بھیجنے والے ساتھیوں پر زور دیتے ہوئےکہا کہ آپ دوبارہ اپنے معافی نامےپر غورکرتے ہوئےاپنی غلطیوں کا احساس کریں اورحتی المقدور کوشش کریں کہ آپ سے آئندہ ایسی غلطیوں کا ارتکاب نہ ہو۔
رابطہ کمیٹی کی جانب سے یہ فیصلہ بانی وقائد جناب الطاف حسین کو بھیجا گیا جنہوں نے رابطہ کمیٹی کے اس فیصلے کی توثیق کردی ہے اوردعا کی ہے کہ اللہ تعالیٰ معافی نامے بھیجنے والے ساتھیوں کو ایسی غلطی دہرانے کے عمل سے باز رکھے اورانہیں تحریک کا سچا وفاداراورثابت قدم ساتھی بنائے رکھے۔جناب الطاف حسین نے ان کارکنان سےکہا ہےکہ وہ خود بھی اپنے ضمیر اوراللہ تعالیٰ کی بارگاہ میں دل سے دعا کریں کہ وہ اب آخری سانس تک تحریک کے وفادار رہیں گے اورکسی بھی غلط راستے پر نہیں جائیں گے۔
بانی وقائد جناب الطاف حسین نےمعاف کئے جانے والےکارکنوں کوہدایت کی ہےکہ وہ اپنے متعلقہ یونٹوں اورسیکٹروں کے وفاپرست ساتھیوں سے فی الفوررابطہ کریں۔ جناب الطاف حسین نے یونٹوں، سیکٹروں اورزونوں کے وفاپرست ساتھیوں سے بھی کہا ہے کہ وہ ایسے ساتھیوں کے بارے میں تصدیق کے لئے اپنے سیکٹروں اورزونوں کے تنظیمی معاملات دیکھنے والے رابطہ کمیٹی یاسی ای سی کے ارکان یا رابطہ کمیٹی کے کسی بھی رکن سے رابطہ کرسکتے ہیں۔
جاری کردہ
مرکزی شعبہ اطلاعات
متحدہ قومی موومنٹ
انٹرنیشنل سیکریٹریٹ لندن