سکھوں کی مقدس کتاب کی بیحرمتی کے واقعات قابل مذمت ہیں۔ الطاف حسین

لندن۔۔۔23 مئی 2014ء

متحدہ قومی موومنٹ کے قائدجناب الطاف حسین نے سکھوں کی مقدس کتاب کی بیحرمتی کے واقعات کی شدیدمذمت کی ہے اور وزیراعظم نوازشریف اوروفاقی کابینہ سے مطالبہ کیاہے کہ ہنگامی اجلاس کرکے سکھ برادری کی شکایات کاازالہ کیاجائے ، اوران کی مقدس کتاب کی بیحرمتی کرنے والوں کوقرارواقعی سزادی جائے ۔ انہوں نے یہ بات ایم کیوایم کے مرکزنائن زیروپر ایم کیوایم کے منارٹی ونگ کے ارکان سے فون پرگفتگوکرتے ہوئے کہی جن میں سکھ، عیسائی ،ہندو اوردیگرمذہبی اقلیتوں سے تعلق رکھنے والے ارکان شامل تھے۔ جناب الطاف حسین نے کہاکہ مقدس کتاب کی بیحرمتی کے واقعات پر سکھ برادری کوجوصدمہ پہنچاہے میں اس دکھ میں برابرکاشریک ہوں۔انہوں نے کہاکہ کسی بھی مذہب کی مقدس کتابوں ،شخصیات ،مقامات اورعبادت گاہوں کی بیحرمتی کرنے والا خواہ کسی بھی مذہب سے تعلق رکھتاہووہ اسی سزاکامستحق ہے جوسزا کسی غیرمسلم کیلئے اسلام کی مقدس کتابوں،مقدس مقامات اورعبادت گاہوں اورمقدس ہستیوں کی بیحرمتی کرنے والے کیلئے مقررہے۔انہوں نے کہاکہ ایم کیوایم پاکستان میں آبادتمام مذہبی اقلیتوں کوبرابرکاپاکستانی سمجھتی ہے اوران کے تمام حقوق کوتسلیم کرتی ہے ، ایم کیوایم سمجھتی ہے کہ پاکستان میں آبادتمام مذہبی اقلیتوں کی جان ومال کے ساتھ ساتھ ان کی عبادت گاہوں کی حفاظت کرنا بھی حکومت کی ذمہ داری بنتی ہے ۔انہوں نے مزید کہاکہ پاکستان کاآئین تمام مذاہب کے ماننے والوں کو ان کے مذہبی عقائدکے مطابق عبادت کرنے کی آزادی اوراپنے مذہب کی تبلیغ کرنے کا حق دیتاہے۔ آئین جس طرح مسلمانوں کی مقدس کتابوں کے احترام کادرس دیتاہے اسی طرح مذہبی اقلیتوں کی مقدس کتابوں کابھی احترام کرتاہے لہٰذ ا وزیراعظم نوازشریف کوچاہیے کہ وفاقی کابینہ کاہنگامی اجلاس منعقد کرکے سکھوں کی مقدس کتاب کی بے حرمتی کے واقعہ میں ملوث افراد کے خلاف سخت کارروائی کی جائے اورانہیں کیفرکردار تک پہنچایاجائے۔جناب الطاف حسین نے ایم کیوایم کے اقلیتی ونگ کے ارکان سے کہاکہ وہ سکھ برادری کے تمام افراد تک میراپیغام پہنچائیں کہ ان کی مقدس کتاب کی بیحرمتی کے واقعہ پر میں ان کے دکھ اورغم میں برابر کاشریک ہوں۔