ایم کیو ایم کے کارکنان کو تواتر کے ساتھ نشانہ بنایا جانا حق پرستی کی تحریک کے خلاف سازش کا حصہ ہے ، ایم کیو ایم رابطہ کمیٹی

کراچی ۔۔۔18مئی2014ء

متحدہ قومی موومنٹ کی رابطہ کمیٹی نے فیڈرل بی ایریا سیکٹر کے کارکن محمد اسماعیل کو نامعلوم مسلح افراد کی جانب سے قتل کئے جانے کے واقعے کی شدید الفاظ میں مذمت کرتے ہوئے ان کے قتل کو ایم کیو ایم کے خلاف ساز ش کا حصہ قرار دیا ہے ،رابطہ کمیٹی نے کہاکہ ایم کیو ایم کے کارکنان کو تواتر کے ساتھ نشانہ بنانے کے واقعا ت شہر کا امن خراب کرنے کی سازش ہیں لیکن ایم کیو ایم کے کارکنان ا پنے قائد جناب الطاف حسین کی تعلیمات پر عمل پیرا ہوتے ہوئے صبر کر رہے ہیں اور اللہ تعالیٰ کی مد د و نصرت کے منتظر ہیں ۔ رابطہ کمیٹی نے شہید کے سوگوار لواحقین سے اظہار ہمدردی کیا ہے اور انکے درجات کی بلندی کے لیے دعا کی ہے ۔دریں اثنا ء محمد اسماعیل کو اوکھائی قبرستان مواچھ گوٹھ میں سپر د خا ک کر دیا گیا ۔ شہید کی نماز جنازہ اتوار کے روز میمن مسجد صدیق آباد ،حسین آباد میں ادا کی گئی ۔ نماز جنازہ و تدفین میں ایم کیو ایم رابطہ کمیٹی کے رکن عبد الحسیب ،حق پرست رکن سندھ اسمبلی افتخار عالم، کراچی تنظیمی کمیٹی کے رکن راشد جلال سمیت ایم کیو ایم کے مختلف سیکٹرز و یونٹس کے ذمہ داران ، کارکنا ن، اہل علاقہ اور شہید کے لواحقین نے بڑی تعداد میں شرکت کی ۔