قائد تحریک الطاف حسین سے پاکستانی ہونے کا حق کوئی طاقت نہیں چھین سکتی۔ آرگنائزرایم کیو ایم امریکہ جنید فہمی

شکاگو۔۔۔13مئی2014ء

متحدہ قومی موومنٹ امریکہ کے سینٹرل آرگنائزر جنید فہمی و اراکین نے قائد تحریک جناب الطاف حسین کےNICOP کارڈ اور پاسپورٹ کے اجراء میں رکاوٹیں ڈالنے کی شدید الفاظ میں مذمت کرتے ہوئے اس عمل کوپاکستان کے آئین اور قانون کی کھلی خلاف ورزی قرار دیا ہے۔ایک مشترکہ بیان میں انہوں نے کہا کہ قائد تحریک الطاف حسین ملک میں فرسودہ ، جاگیردارانہ و وڈیرانہ نظام کے خاتمے کی جدو جہد کر رہے ہیں اسہی وجہ سے انکی شناختی دستاویزات سے محروم رکھ کر انہیں ملک پر مسلط وڈیرانہ، جاگیردارانہ اور انتہا پسندانہ نظام کے خلاف جدوجہد کی سزا دی جارہی ہے، اگر ملک دشمن او ر انتشار پسند عناصر یہ سمجھتے ہیں کہ وہ قائد تحریک الطاف حسین کو اورسیز پاکستانیوں کے لئے مخصوص شناختی کارڈ سے محروم رکھ کر بحیثیت پاکستانی ان سے ان کی شناخت چھین سکتے ہیں تو یہ سراسر نادانی ہے۔انھوں نے کہا کہ جناب الطاف حسین کی پاکستان سے محبت ، لگن اور خلوص اور ملک کی تعمیر و ترقی کے لیے انکی کوششیں کسی بھی محب وطن پاکستانی سے ڈھکی چھپی نہیں ہیں۔انھوں نے کہا کہ جناب الطاف حسین سے پاکستانی ہونے کا حق کوئی طاقت نہ چھین سکتی اور نہ ہی انہیں کسی بھی شخص سے حب الوطنی کے سرٹفکیٹ کی ضرورت ہے۔ انہوں نے مزید کہا کہ قائد تحریک کی پاکستان میں استحصالی نظام کے خلاف اور مظلوم و محروم عوام کے حقوق کی جدوجہد نے ملک پر قابض 2% مراعات یافتہ طبقے کوخوف زدہ کر دیا ہے اور وہ اوچھے ہتھکنڈوں کے ذریعے الطاف حسین کو پاکستان کی سرزمین اور عوام سے دور رکھنا چاہتے ہیں۔ایم کیو ایم امریکہ کی سینٹرل کمیٹی نے کہا کہ حق پرست عوام کے قائد جناب الطاف حسین کے خلاف سازشوں کا سلسلہ فوری بند کیا جائے ورنہ پاکستان سمیت امریکہ اور دنیا بھر میں ایم کیو ایم کے کارکنان اور ہمدرد سراپا احتجاج ہوں گے۔آخر میں انہوں نے صدر پاکستان ، وزیر اعظم اور وزیر داخلہ سے مطالبہ کیا کہ جناب الطاف حسین کو فوری طور پر NICOP کارڈ اور پاسپوٹ جاری کیا جائے تاکہ کروڑوں پاکستانیوں میں پائی جانے والی بے چینی کا خاتمہ ہو سکے۔