معاشی حب کراچی میں واٹر ٹینکر مافیا اور غیر قانونی واٹر ہائیڈرنٹس کھلے عام پانی چوری میں ملوث ہیں، حق پرست ارکان سندھ اسمبلی
شدید گرمی میں پانی کا فقدان عوام کی مشکلات میں اضافہ کر رہا ہے، جس سے شہر کے عوام ذہنی دباؤ کا شکار ہو رہے ہیں، ارکان سندھ اسمبلی
وفاقی وزیر مملکت ،وزیر اعلیٰ سندھ سید قائم علی شاہ اور واٹر بورڈ کے چےئر مین شرجیل انعام میمن کراچی میں موجود غیر قانونی واٹر ہائیڈرنٹس اور پانی چوری میں ملوث دیگر عناصر کے خلاف فوری کار روائی کر کے شہر میں پانی کے مصنوعی بحران کا خاتمہ کرائیں،حق پرست ارکان سندھ اسمبلی کا مطالبہ
کراچی ۔۔۔ 11مئی 2014ء
حق پرست ارکان سندھ اسمبلی نے کراچی میں پانی کی چوری اور سینکڑو ں کی تعداد میں غیر قانونی واٹر ہائیڈرنٹس کی موجودگی کے سبب شہر میں پانی کے شدید بحران پر تشویش کا اظہار کیا ہے ۔ایک مشترکہ بیان میں ارکان سندھ اسمبلی نے کہاکہ ایک جانب بارشیں نہ ہونے کے سبب حب ڈیم میں پانی کی سطح کم ہوتی جارہی ہے تو دوسری جانب ملک کا معاشی و معاشرتی حب کراچی میں واٹر ٹینکر مافیا اور غیر قانونی واٹر ہائیڈرنٹس کھلے عام پانی کی چوری میں ملوث ہیں جس کے باعث کراچی کے مختلف علاقوں میں پانی کا شدیدبحران پیدا ہو رہاہے۔حق پرست ارکان اسمبلی نے عوامی نمائندگی کرتے ہوئے کہا کہ شدید گرمی میں پانی جیسی بنیادی انسانی سہولت کا فقدان عوام کی مشکلات میں اضافہ کر رہا ہے جس سے شہر کے عوام ذہنی دباؤ کا شکار ہو رہے ہیں ۔ حق پرست ارکان سندھ اسمبلی نے وفاقی وزیر مملکت عابد شیر علی ،وزیر اعلیٰ سندھ سید قائم علی شاہ اور واٹر بورڈ کے چےئر مین و وزیر بلدیات شرجیل انعام میمن سے مطالبہ کیا ہے کہ وہ کراچی شہر میں موجود غیر قانونی واٹر ہائیڈرنٹس اور پانی چوری میں ملوث دیگر عناصر کے خلاف فوری کار روائی کر کے شہر میں پانی کے مصنوعی بحران کا خاتمہ کرائیں تاکے شدید گرمی میں بجلی کی لوڈ شیڈنگ ، پانی کے بحران کے سبب کراچی کے عوام کی شدید پریشانیوں میں کسی حد تک کمی آ سکے