حکومت اور اپوزیشن رہنما ملک کی موجودہ انتہائی نازک صورتحال کو سامنے رکھتے ہوئے انتہائی سنجیدگی، بردباری اور صبر وتحمل کا مظاہرہ کریں۔ الطاف حسین

لندن۔۔10مئی 2014ء

متحدہ قومی موومنٹ کے قائد جناب الطاف حسین نے اپنے ایک ہنگامی بیان میں حکومت اوراپوزیشن رہنماؤں سے پرذوراپیل کی کہ ملک کی موجودہ انتہائی نازک صورتحال کوسامنے رکھتے ہوئے انتہائی سنجیدگی ، بردباری اورصبروتحمل کامظاہرہ کریں۔انہوں نے وزیراعظم میاں محمدنوازشریف سے خصوصی طورپرکہاکہ وہ اپنے بڑے پن کامظاہرہ کرتے ہوئے حکومت اوراپوزیشن کی موجودہ کشمکش کوپرامن طریقہ سے حل کرنے میں اپنامثبت کردار اداکریں۔ جناب الطاف حسین نے کہاکہ اپنے مطالبات کے حق میں جلسے جلوس اور مظاہرے کرناہر جماعت کاآئینی، قانونی اورجمہوری حق ہے لہٰذا وزیراعظم نوازشریف کوچاہیے کہ وہ اپوزیشن جماعتوں کی جانب سے 11مئی کو کئے جانے والے احتجاجی جلسوں ،جلوسوں اور مظاہروں کو جمہوری اصولوں کے تحت ہونے دیں اوران جلسوں اورمظاہروں کوروکنے کیلئے غیرجمہوری اورغیرآئینی ہتھکنڈے استعمال کرنے سے گریزکیا جائے اورحکومت اپنے عمل کے ذریعے یہ ثابت کریں کہ وہ جمہوری اقدارکی پاسداری پر یقین رکھتی ہے ۔انہوں نے احتجاجی جلسے جلوس اورمظاہرے کرنے والی جماعتوں سے بھی اپیل کی کہ وہ بھی پرامن رہ کرثابت کریں کہ وہ پرامن طریقے سے اپنااحتجاج رجسٹرڈکراناچاہتے ہیں اورکسی بھی قسم کے غیرقانونی طریقہ کار کو اختیار نہیں کرناچاہتے۔جناب الطاف حسین نے وفاقی وزیر داخلہ چوہدری نثار کو مخاطب کرتے ہوئے کہا کہ ان شکایات کی بھی فوری تحقیقات کرائی جائے کہ حکومتی مشینری کواستعمال کرکے ملک کے مختلف شہروں میں پیٹرول پمپس بندکرائے جارہے ہیں، ٹرانسپورٹرز اور پرائیویٹ گاڑیوں کے مالکان کودھمکیاں دی جارہی ہیں کہ وہ احتجاج کرنے والی جماعتوں کواپنی گاڑیاں نہ دیں ۔ جناب الطا ف حسین نے کہاکہ اس وقت خواہ حکومت اورحکومتی جماعت کے ارکان ہوں یااپوزیشن جماعتوں کے ارکان ، سب کوانتہائی سنجیدگی، بردباری اورضبط وبرداشت سے کام لیناچاہیے۔