ایم کیوایم ناظم آباد گلبہار سیکٹر کے کارکن شاہ رخ کے بہیمانہ قتل میں ملوث دہشت گردوں کو گرفتار کیاجائے ، رابطہ کمیٹی ایم کیوایم

کراچی ۔۔۔30، اپریل 2014ء 

متحدہ قومی موومنٹ کی رابطہ کمیٹی نے مسلح دہشت گردوں کی فائرنگ سے ایم کیوایم ناظم آباد گلبہار سیکٹر یونٹ 183کے کارکن شاہ رخ کے بہیمانہ قتل کی سخت ترین الفاظ میں مذمت کی ہے اور قتل کی اس واردات کو شہر کا امن تباہ کرنے کی سازش کا حصہ قرار دیا ہے ۔ ایک بیان میں رابطہ کمیٹی نے کہاکہ شہر میں ایم کیوایم کے کارکنان کو فائرنگ کا نشانہ بنا کر تسلسل کے ساتھ بیدردی سے قتل کیاجارہا ہے لیکن قاتل پھر بھی قانون کی گرفت سے محفوظ ہیں ۔ رابطہ کمیٹی نے شاہ رخ شہید کے تمام سوگوار لواحقین سے دلی تعزیت وہمدردی کااظہار کرتے ہوئے انہیں صبر کی تلقین کی اور دعا کی کہ اللہ تعالیٰ شہید کو جنت الفردوس میں اعلیٰ مقام عطا فرمائے اور سوگواران کو صبرجمیل عطا کرے ۔ رابطہ کمیٹی نے صدر مملکت ممنون حسین ، وزیراعظم نواز شریف ، وفاقی وزیرد اخلہ چوہدری نثار علی خان ، گورنر سندھ ڈاکٹر عشرت العباد اور وزیراعلیٰ سندھ سید قائم علی شاہ سے مطالبہ کیا کہ ایم کیوایم ناظم آبادگلبہار سیکٹر کے کارکن شاہ رخ کے بہیمانہ قتل میں ملوث سفاک دہشت گردوں کو فی الفور گرفتارکیاجائے اور انہیں کیفر کردار تک پہچایا جائے ۔ دریں اثناء شاہ رخ شہید کو آہوں اور سسکیوں کے درمیان پاپوش نگر کے قبرستان میں سپرد خا ک کردیا گیا ۔ شہید کی نماز جنازہ جامع مسجد گول مارکیٹ میں ادا کی گئی ۔ نما زجنازہ اور تدفین میں ایم کیوایم کی رابطہ کمیٹی کے رکن کیف الوریٰ ، کراچی تنظیمی کمیٹی ، ایم کیوایم ناظم آباد گلبہار سیکٹر کمیٹی کے ارکان ، یونٹوں کے ذمہ داران ، کارکنان ، ہمدردوں اور شہید کے عزیز واقارب نے شرکت کی ۔