ایم کیوایم کے سابق چیئرمین عظیم احمد طارق شہید کو الطاف حسین کا زبردست خراج عقیدت

متحدہ قومی موومنٹ کے قائد جناب الطاف حسین نے ایم کیوایم کے سابق چیئرمین عظیم احمد طارق شہید کو زبردست خراج عقیدت پیش کیا ہے ۔ سابق چیئرمین عظیم احمد طارق شہید کی 21ویں برسی کے موقع پر اپنے بیان میں جناب الطاف حسین نے کہا کہ ایم کیوایم کی حق پرستانہ جدوجہد میں شہداء نے اپنی قیمتی جانوں کا نذرانہ پیش کرکے جو قربانیاں دیں ہیں وہی ایم کیوایم کا اثاثہ ہیں۔ انہوں نے کہاکہ ایم کیوایم مخالف قوتوں نے سابق چیئرمین عظیم احمد طارق شہید کو سفاکانہ طریقے سے قتل کیا اور یہ بہیمانہ قتل ایم کیوایم کو صفحہ ہستی سے مٹانے کی گھناؤنی سازش کا حصہ تھا ۔انہوں نے کہاکہ جس حق پرستی کی تحریک میں اپنے ظرف و ضمیر کا سودا نہ کرنے والے اور اصولوں پر ڈٹ جانے والے رہنما ، ذمہ داران اور کارکنان شامل ہوں اسے دنیا کی کوئی طاقت ختم نہیں کرسکتی ۔انہوں نے کہاکہ ایم کیوایم حق پرستی کی راہ میں اپنی جانوں کے نذرانے دینے والے حق پرست شہداء کی قربانیوں کو کبھی فراموش نہیں کرے گی اور انشاء اللہ حق پرستی کی تحریک کے منزل تک پہنچنے تک اپنی جدوجہد جاری رکھے گی ۔جناب الطاف حسین نے دعا کی کہ اللہ تعالیٰ عظیم احمد طارق شہید سمیت تحریک کے تمام شہداء کے درجات بلند فرمائے ، انہیں جنت الفردوس میں اعلیٰ مقام عطا کرے اور ان کی عظیم قربانیوں کو اپنی بارگاہ میں قبول فرما کر انہیں تحریکی کارکنان کیلئے مشعل راہ بنا دے ۔