ملک کی حفاظت اور دہشت گردوں کا مقابلہ کرتے ہوئے ہزاروں جانوں کا نظرانہ پیش کرنے والے پاک فوج کے شہداء کو جناب الطاف حسین کا زبردست خراج عقیدت

لندن ۔۔30اپریل 2014ء

متحدہ قومی موومنٹ کے قائد جناب الطاف حسین نے پاک فوج کے شہید ہونے والے جوانوں کی یاد میں یوم شہداء کے موقع پر پاک فوج کے شہداء کو خراج عقیدت پیش کر تے ہوئے کہا ہے کہ پاک فوج کے جوان ملک کی شان ،ملک کی عزت اور ملک کا وقار ہیں ۔ اپنے بیان میں جناب الطاف حسین نے کہا کہ اللہ تعالیٰ کے بعد پاک افواج کے جوان ملک کی حفاظت پر مامور ہیں جو شدید گرمی ،سردی اور حالات وجان کی پروہ کئے بغیر ملک کی سرحدوں پر اپنے فرائض انجام دیتے ہیں جس کی وجہ سے عوام چند لمحوں ہی صحیح کم ازکم چین اور سکو ن کی نیند سو جاتے ہیں ۔جناب الطاف حسین نے تمام سیاسی ومذہبی جماعتوں ،سماجی تنظیموں اورانسانی حقو ق کی تنظیموں سے اپیل کی ہے کہ وہ ملک کی حفاظت اوربقاء کیلئے اپنی قیمتی جانوں کا نذرآنہ پیش کرنے والے مسلح افواج کے شہداء کے بچوں کی تعلیم و تربیت اور کفالت کیلئے جو بھی تعاون کر سکتے ہیں وہ کریں ۔ انہوں نے ملک کی حفاظت اور دہشت گردو ں کا مقابلہ کر تے ہوئے ہزاروں جانوں کا نذرآنہ پیش کرنے والے پاک فوج کے شہداء کو زبردست خراج عقیدت پیش کرتے ہوئے دعا کی کہ اللہ تعالیٰ تمام شہداء کو جنت الفردوس میں اعلیٰ مقام عطا کرے اور سوگواران کو صبر جمیل کی توفیق دے ۔آمین ،جناب الطاف حسین زخمی ہونے والے جوانوں کیلئے بھی جلد ومکمل صحتیابی کیلئے دعا کی ہے ۔