میرپورخاص میں حکومتی اداروں کے منقطع بجلی کنکشن بحال کر کے عوام کو ریلیف دیا جائے ، حق پرست رکن سندھ اسمبلی ڈاکٹر ظفر کمالی

کراچی ۔۔۔ 26اپریل 2014ء

متحدہ قومی موومنٹ سے سندھ اسمبلی کے رکن ڈاکٹر ظفر کمالی نے ضلع میر پور خاص میں واپڈاکی جانب سے بلدیاتی اداروں کی بجلی کی بندش کے باعث عوام کو ہونے والی مشکلات پر گہری تشویش کا اظہار کیا ہے ۔اپنے بیان میں کہا کہ حق پرست رکن سندھ اسمبلی نے وفاقی وزیر مملکت عابد شیر علی کی ہدایت پر تین روز قبل نکاسی و فراہمی آب کے کنکشن منقطع کئے گئے تھے جو تاحال بحال نہیں کئے گئے ہیں ۔انھوں نے کہا کہ ملک کے اداروں کی آپس میں چپقلش کے سبب ضلع میر پور خاص کے حق پرست عوام کو دشواریوں کا سامنا کرنا پڑ رہا ہے ۔ انھوں نے بلدیاتی اداروں کے ذمہ داران سے استدعا کی کہ وہ واپڈا کو بقایا جات کی فراہمی ممکن بنائیں تاکہ میر پورخاص کی منقطع بجلی کنکشن بحال کئے جائیں اور عوام کو درپیش مشکلات کا خاتمہ کیا جا سکے ۔ ڈاکٹر ظفر کمالی نے وفاقی حکومت سے مطالبہ کیا ہے کہ وہ میر پورخاص کے مظلوم عوام کو درپیش مسائل کو مد نظر رکھتے ہوئے میر پورخاص ضلع میں بلدیاتی اداروں کے منقطع کنکشن بحال کروائے تاکہ میر پور خاص کے غیور عوام کو درپیش مسائل میں کمی واقع ہو سکے ۔