مسلح دہشت گردوں کی فائرنگ سے شہید ہونے والے ایم کیوایم لیاقت آباد سیکٹر کے سینئر کارکن محمد نسیم اور ہمدرد محمد شبیر کوآہوں اور سسکیوں کے درمیان یاسین آباد کے شہداء قبرستان میں سپرد خاک کردیا گیا

کراچی ۔۔۔16، اپریل 2014ء 

گزشتہ روز مسلح دہشت گردوں کی فائرنگ سے شہید ہونے والے ایم کیوایم لیاقت آباد سیکٹر یونٹ 162کے سینئر کارکن محمد نسیم اورہمدرد محمد شبیر کو آہوں اور سسکیوں کے درمیان یاسین آباد کے شہداء قبرستان میں سپرد خاک کردیا گیا ۔ شہداء کی نما ز جنازہ فیڈر ل بی ایریا بھائی جان چوک کے قریب واقع فاروق اعظم مسجد میں ادا کی گئی ۔ نما ز جنازہ اور تدفین میں ایم کیوایم کی رابطہ کمیٹی کے ارکان سید امین الحق ، عادل خان ،معاون رابطہ کمیٹی اظہار احمد خان، حق پرست رکن قومی اسمبلی سفیان یوسف ، حق پرست ارکان سندھ اسمبلی افتخار عالم ، خالد بن ولایت ، کراچی تنظیمی کمیٹی کے اراکین ، فیڈرل بی ایریا اور لیاقت سیکٹر کمیٹیوں کے ارکان ، یونٹوں کے ذمہ داران ، کارکنان ، ہمدردوں اور شہداء کے عزیز واقارب نے بڑی تعداد میں شرکت کی ۔ شہداء کی نماز جنازہ اور تدفین کے موقع پر فضاء سوگوار تھی اور انتہائی رقت آمیز مناظر دیکھنے میں آئے ، شہداء کے عزیز و اقارب اور ایم کیوایم کے کارکنان غم سے نڈھال تھے جنہیں ایم کیوایم کی رابطہ کمیٹی کے اراکین نے حوصلہ دیا اور صبر کی تلقین کی ۔