ایم کیو ایم رابطہ کمیٹی کے رکن احمد سلیم صدیقی کی حافظ محمد سلفی سے جامع ستاریہ میں ملاقات

کراچی ۔۔۔ 13؍ اپریل 2014ء

متحدہ قومی موومنٹ کی رابطہ کمیٹی کے رکن احمد سلیم صدیقی نے جامع ستاریہ کے مدیر اعلیٰ اور اہل حدیث کے رہنما حافظ محمد سلفی سے مدرسہ جامع ستاریہ میں ملاقات کی ۔اس موقع پر حق پرست رکن صوبائی اسمبلی انور رضا اور ایم کیو ایم کی علما ء کمیٹی کے انچارج جاوید احمد اوراراکین بھی موجود تھے ۔ ملاقات میں رابطہ کمیٹی کے رکن احمد سلیم صدیقی نے ھافظ محمد سلفی سے گفتگو کرتے ہوئے کہاکہ قائد تحریک الطاف حسین نے ہمیشہ مذہبی ہم آہنگی اور بھائی چارے کے فروغ پر زور دیا ہے اور یہی وجہ ہے کہ جناب الطاف حسین کی جانب سے تمام مذاہب کے عوام کے حقوق کیلئے آواز کی جاتی ہے ۔انہوں نے کہا کہ ایک مرتبہ پھر ملک کو فرقہ واریت اور مذہبی انتہا پسندی کی آگ میں جھونکنے کی کوششیں کی جارہی ہیں لیکن ملک کے با شعور عوام دشمنوں کی تمام تر سازشیں اپنے ماضی کی طرح اپنے اتحاد سے ناکام بنادیں گے ۔اس موقع پر حافظ محمد سلفی نے ایم کیو ایم کے وفد کا خیر مقدم کیا اور انتہا پسندی کے خاتمے کے لیے جناب الطاف حسین کے کردار کو سراہا ۔حافظ محمد سلفی نے کہا کہ شیعہ سنی اکابرین ، ڈاکٹرز ، وکلاء کو ٹارگٹ کلنگ کا نشانہ بنا کر عوام کو یہ تاثر دینے کی کوشش کی جارہی ہے جیسے یہ مذہبی جھگڑا ہے ۔انھوں نے عوام سے اپیل کی کہ وہ فرقہ واریت کی آگ بھڑکانے والے عناصر پر کڑی نظر رکھیں اور کسی بھی واقعہ پر اشتعال انگیزی کے مظاہرے سے نہ صرف گریز کریں بلکہ افواہوں پر بھی یقین نہ کریں ۔