گلستان جوہر میں مسلح دہشت گردوں کی فائرنگ سے شہید ہونے والے ایم کیوایم کے ہمدرد ڈاکٹر رضا حیدر کی نما زجنازہ اور تدفین حق پرست ارکان قومی وصوبائی اسمبلی کی شرکت

کراچی ۔۔۔11، اپریل 2014ء 

گلستان جوہر میں مسلح دہشت گردوں کی فائرنگ سے شہید ہونے والے ایم کیوایم کے ہمدرد ڈاکٹر رضا حیدر کو وادی حسین قبرستان میں سپرد خاک کردیا گیا ۔ شہید کی نما زجنازہ اور تدفین میں ایم کیوایم رابطہ کمیٹی کی جانب سے اظہار احمد خان ، حق پرست ارکان قومی اسمبلی شیخ صلاح الدین ، مزمل قریشی ، حق پرست ارکان سندھ اسمبلی انور رضا ، افتخار عالم ، عدنان احمد ، ایم کیوایم کراچی تنظیمی کمیٹی کے اراکین ، گلستان جوہر سیکٹر کمیٹی کے ارکان ، یونٹوں کے ذمہ داران ،کارکنان ، ہمدردوں اور شہید کے عزیز واقارب نے بڑی تعداد میں شرکت کی ۔ بعدازاں حق پرست ارکان قومی وصوبائی اسمبلی نے ڈاکٹر رضا حیدر شہید کے والد ، چچا اور دیگر سوگوار لواحقین سے ملاقات کی اور بہیمانہ قتل کی سخت ترین الفاظ میں مذمت کی ۔ انہوں نے ڈاکٹر رضا حیدر کی شہادت پر سوگوار لواحقین سے قائد تحریک جناب الطاف حسین کی جانب سے گہرے دکھ اور افسوس کااظہار کرتے ہوئے انکے بلند درجات اور لواحقین کیلئے صبرجمیل کی دعا بھی کی ۔ حق پرست ارکان قومی وصوبائی اسمبلی نے حکومت سندھ سے مطالبہ کیا کہ ایم کیوایم کے ہمدرد ڈاکٹر رضا حیدر شہید کے قتل میں ملوث سفاک قاتلوں کو فی الفور گرفتار کیاجائے اور انہیں قرار واقعی سزا دی جائے ۔