پاکستانی کرکٹ ٹیم کی شاندار کامیابی پر قومی ٹیم اورقوم کوالطاف حسین کی مبارکباد

لندن۔۔۔30، مارچ2014ء

متحدہ قومی موومنٹ کے قائد جناب الطاف حسین نے ٹی ٹوینٹی کرکٹ ٹورنامنٹ میں بنگلہ دیشی ٹیم کے خلاف پاکستانی کرکٹ ٹیم کی شاندار کامیابی پر قومی کرکٹ ٹیم اورقوم کو دلی مبارکباد پیش کی ہے ۔ ایک بیان میں جناب الطاف حسین نے کہاکہ پاکستانی کرکٹ ٹیم نے بنگلہ دیش کرکٹ ٹیم کے خلاف شاندار کھیل کامظاہرہ کیا ہے جس پر قومی ٹیم کاایک ایک کھلاڑی بالخصوص احمد شہزاد زبردست خراج تحسین کے مستحق ہیں۔ جناب الطاف حسین نے کہاکہ پاکستان کا اگلا میچ ویسٹ انڈیز سے ہوگا جوکہ انتہائی اہمیت کاحامل ہے، پوری قوم کی امیدیں قومی کرکٹ ٹیم پرلگی ہوئی ہیں لہٰذا پاکستانی کرکٹ ٹیم کو ویسٹ انڈیزکرکٹ ٹیم کے خلاف بھی اسی طرح محنت ولگن ، نظم وضبط، اسپورٹس مین اسپرٹ اورٹیم ورک کامظاہرہ کرکے شاندارکامیابی حاصل کرنی ہوگی تاکہ ٹی ٹوینٹی کرکٹ ٹورنامنٹ میں کامیابی حاصل کرکے پاکستان کا نام روشن ہوسکے۔ جناب الطاف حسین نے پاکستانی کرکٹ ٹیم کو دلی مبارکباد پیش کرتے ہوئے قومی کرکٹ ٹیم کی شاندارکامیابی کیلئے اپنی نیک خواہشات کا بھی اظہارکیا۔