غیرمسلم پاکستانیوں اور ان کی عبادت گاہوں کو تحفظ فراہم کیا جائے، الطاف حسین
ہندو برادری کی عبادت گاہوں پر شرانگیزی کے مسلسل واقعات سے غیرمسلم پاکستانیوں میں عدم تحفظ پایاجاتا ہے
ایم کیوایم ، غیرمسلم پاکستانیوں کے حقوق کیلئے اپنا ہرممکن کردارادا کرتی رہے گی
ٹنڈومحمد خان روڈ پر ہندوؤں کے مندرکو نقصان پہنچانے پراظہارمذمت
لندن۔۔۔30، مارچ2014ء
متحدہ قومی موومنٹ کے قائد جناب الطاف حسین نے شرپسند عناصر کی جانب سے حیدرآباد کے علاقے ٹنڈومحمد خان روڈ پر ہندوؤں کے مندرکو نقصان پہنچانے کی سخت ترین الفاظ میں مذمت کی ہے اورمطالبہ کیا ہے کہ غیرمسلم پاکستانیوں اور ان کی عبادت گاہوں کو تحفظ فراہم کیا جائے ۔ ایک بیان میں جناب الطاف حسین نے کہاکہ پاکستان میں بسنے والی ہندو برادری کی عبادت گاہوں پر شرانگیزی کے مسلسل واقعات سے ایک جانب غیرمسلم پاکستانیوں میں عدم تحفظ پایاجاتا ہے اوردوسری جانب اس قسم کے گھناؤنے عمل سے پوری دنیا میں پاکستان کا نام بدنام ہورہا ہے جس کی جتنی بھی مذمت کی جائے کم ہے ۔ جناب الطاف حسین نے گورنرسندھ ڈاکٹرعشرت العباد اور وزیراعلیٰ سندھ سید قائم علی شاہ سے مطالبہ کیا کہ غیرمسلم پاکستانیوں کی عبادت گاہوں پر شرانگیزی کے واقعات کا سختی سے نوٹس لیاجائے ، ان واقعات میں ملوث عناصر کو گرفتارکرکے سخت ترین سزا دی جائے اور غیرمسلم پاکستانیوں اور ان کی عبادت گاہوں کو تحفظ فراہم کیاجائے ۔ جناب الطاف حسین نے ہندو برادری سے دلی ہمدردی کا اظہار کرتے ہوئے کہاکہ ایم کیوایم ، غیرمسلم پاکستانیوں کے حقوق کیلئے اپنا ہرممکن کردارادا کرتی رہے گی ۔