ایم کیوایم علماء کمیٹی کے ارکان کی لاہور میں سنی اتحاد کونسل لاہور کے مفتی حسیب الرحمن ، دارالعلوم حزب الاحناف کے مہتمم اعلیٰ پیر سید صاحبز اد ہ مصطفی اشرف اور بادشاہی مسجد کے مولانا عبد ل کبیر آزاد سے ملاقاتیں اور صوفیائے کرام کانفرنس میں شرکت کی دعوت

لاہور ۔۔۔07،مارچ2014ء 

متحدہ قومی موومنٹ کی جانب سے لاہور کی وحدت کالونی میں واقع ڈونگی گراؤنڈ میں ہونے والی عظیم الشان ’’صوفیائے کرام ‘‘ کانفرنس کے سلسلے میں مذہبی ، سیاسی ، سماجی اور دینی شخصیات کو دعوت نامے دینے کا سلسلہ جاری ہے ۔ اس سلسلے میں ایم کیوایم کی علماء کمیٹی کے ارکان ناصر یامین اور تبشیر الحق تھانوی نے سنی اتحاد کونسل لاہور کے مفتی حسیب الرحمن ، دارالعلوم حزب الاحناف کے مہتمم اعلیٰ پیر سید صاحبزادہ مصطفی اشرف اور بادشاہی مسجد لاہور کے مولانا عبد ل کبیر آزاد سے ملاقات کی اور انہیں قائد تحریک جناب الطاف حسین کی جانب سے صوفیائے کرام کانفرنس میں شرکت کی دعوت دی ۔ اس موقع پر مفتی حسیب الرحمن ، پیر سید صاحبزادہ مصطفی اشرف اور مولانا عبد ل کبیر آزاد نے صوفیائے کرام کی شان میں کانفرنس کے انعقاد کا خیر مقدم کیا اور کہاکہ صوفیائے کرام کانفرنس کا انعقاد ایک فکری اور روحانی عمل ہے جس کی رحمتیں اور برکتیں ملک بھر پر نازل ہوں گی ۔ 

اسی طرح ایم کیوایم کی علماء کمیٹی کے ارکان سید علی کرار نقوی اور آغا سید اطہر حسین جعفری مشہدی نے لاہور میں وحدت روڈ پر واقع امام بارگاہ زیدی کے ٹرسٹی سید اکبر حسین رضوی ، اچھرہ لاہور ماربل مارکیٹ کی مرکزی امام بارگاہ الحسینی و مسجد و مدرسہ الحسینی کے امام علامہ عباس حسین قمی اور شیعہ فیڈرین کے کنوینر سید وقار حسین شاہ نقوی سے ملاقاتیں کیں اور انہیں صوفیائے کرام کانفرنس کے انعقاد کی ضرورت سے آگاہ کیا ۔علماء کمیٹی کے ارکان نے انہیں صوفیائے کرام کانفرنس میں شرکت کی دعوت دی اور قائدتحریک جناب الطاف حسین کا پیغام پہنچایا ۔ اس موقع پر علمائے کرام نے صوفیائے کرام کانفرنس میں اپنی شرکت کی یقین دہانی کرائی اور امید ظاہر کی کہ یہ کانفرنس ملک سے دہشت گردی اور انتہاء پسندی کے خاتمے کیلئے کلیدی کردار ادا کرے گی ۔