ایم کیوایم کی رابطہ کمیٹی کے ارکان اشفاق منگی اور وسیم اختر کی جسقم کے چیئرمین عبد الواحد آریسر سے عمر کوٹ پریس کلب میں ملاقات

عمر کوٹ ۔۔۔27، جنوری 2014ء 

متحدہ قومی موومنٹ کی رابطہ کمیٹی کے ارکان اشفاق منگی اور وسیم اختر نے پیر کے روز جئے سندھ قومی محاذ کے چیئرمین عبد الواحد آریسر سے عمر کوٹ پریس کلب میں ملاقات کی اور سندھ دھرتی اور اس کے مستقل باشندوں کیلئے جذبہ خیر سگالی ، اتحاد اور یکجہتی کا اظہار کیا ۔اس موقع پر حق پرست ارکان سندھ اسمبلی ڈاکٹر ظفر کمالی ، پونجو مل ایڈووکیٹ اور جسقم کے وائس چیئرمین اسلم خیر پوری اور پریس سیکریٹری امیر حسن پہنور بھی موجود تھے ۔ ملاقات میں رابطہ کمیٹی کے ارکان نے بات چیت کرتے ہوئے کہا کہ قائد تحریک جناب الطاف حسین سندھ دھرتی کی تقسیم ہرگز نہیں چاہتے بلکہ وہ سند ھ کے مستقل باشندوں کے درمیان وسائل کی منصفانہ تقسیم کی بات کررہے ہیں اور وسائل کی منصفانہ تقسیم کو بعض عناصر سندھ دھرتی کی تقسیم سے تعبیر کرکے سندھ کے مستقل باشندوں کے درمیان نفرتیں اور دوریاں پیدا کرنے کی کوششیں کررہے ہیں ۔ رابطہ کمیٹی کے ارکان نے کہاکہ قائد تحریک جناب الطاف حسین سندھ دھرتی کے مستقل باشندوں کے اتحاد اور یکجہتی کی علامت ہیں اور سندھ سمیت ملک بھر کے مظلوم و محروم عوام کے حقوق کے حصول کی عملی جدوجہد کررہے ہیں ۔ ملاقات میں عبد الواحد آریسر اور رابطہ کمیٹی کے ارکان نے سندھ میں غیر قانونی مقیم افغانیوں کے خلاف کارروائی اورسندھ کی سیاسی ، سماجی اور امن و امان کی صورتحال پر بھی تفصیلی تبادلہ خیال کیا اور سندھ دھرتی کے مفاد اور حقوق کے حصول کیلئے کی جدوجہد میں دونوں جانب سے رابطے برقرار رکھنے پر اتفاق کیا گیا ۔ اس موقع پر عبد الواحد آریسر نے ایم کیوایم کے وفد کا خیر مقدم کیا اور سندھ دھرتی کے تحفظ اور یکجہتی کیلئے اپنے ہرممکن تعاون کا یقین دلایا ۔