ایم کیوایم کے سابق رکن قومی اسمبلی سیدعلی رضا عابدی کا بہیمانہ قتل ایک بڑاسانحہ اور گہری سازش کاحصہ ہے

متحدہ قومی موومنٹ کی رابطہ کمیٹی کے کنوینرڈاکٹرندیم احسان، ڈپٹی کنوینرقاسم علی رضا اوراراکین رابطہ کمیٹی نے ایم کیوایم کے سابق رکن قومی اسمبلی سیدعلی رضا عابدی کے بہیمانہ قتل کی شدیدالفاظ میں مذمت کی ہے اوراس واقعہ کو ایک بڑاسانحہ اور گہری سازش کاحصہ قراردیاہے۔ اپنے مشترکہ بیان میں ڈاکٹرندیم احسان اور اراکین رابطہ کمیٹی نے کہاکہ سیدعلی رضاعابدی ایم کیوایم سے علیحدہ ہونے کے باوجود الیکٹرانک میڈیااورسوشل میڈیاپر اپنے جن خیالات کا اظہار کرتے رہتے تھے وہ کسی سے پوشیدہ نہیں تھے اوران کے یہ خیالات اسٹیبلشمنٹ کوبہت کھٹکتے تھے ، آج انہیں جس طرح بیدردی سے فائرنگ کرکے شہید کیا گیا اس نے ہم سب ہی کونہیں بلکہ تمام کارکنان وعوام کوشدیدصدمہ میں مبتلاکردیاہے۔ ڈاکٹرندیم احسان اور اراکین رابطہ کمیٹی نے کہاکہ کراچی میں اچانک جس طرح دہشت گردی کے یہ واقعات شروع ہوئے ہیں اس سے صاف لگتاہے کہ اس طرح کے واقعات کرواکرسندھ کے شہری علاقوں خصوصاًکراچی میں کسی نئے آپریشن کیلئے گراؤنڈبنایاجارہاہے ، علی رضاعابدی کابہیمانہ قتل بھی اسی سلسلے کی کڑی معلوم ہوتاہے ۔ انہوں نے کہاکہ اس خیال کواس بات سے بھی تقویت ملتی ہے کہ ایک طرف یہ بھی کہاجاتاہے کہ مختلف شخصیات کوخطرہ ہے لیکن دوسری جانب سرکاری طورپر مختلف سیاسی شخصیات کودی گئی سیکوریٹی گزشتہ دنوں واپس لے لی گئی ۔ ڈاکٹرندیم احسان اور اراکین رابطہ کمیٹی نے کہاکہ علی رضاعابدی کابہیمانہ قتل مہاجروں کی نسل کشی کاتسلسل ہے جس کاسلسلہ برسوں سے جاری ہے۔ ڈاکٹرندیم احسان اور اراکین رابطہ کمیٹی نے مطالبہ کیاکہ علی رضاعابدی کے بہیمانہ قتل کی اعلیٰ سطحی تحقیقات کرائی جائے اورقاتلوں کوفی الفور گرفتار کیاجائے ۔ ڈاکٹرندیم احسان اور اراکین رابطہ کمیٹی نے علی رضاعابدی کی شہادت پر ان کے والد سیداخلاق عابدی اور ان کے تمام اہل خانہ سے دلی تعزیت کا اظہارکرتے ہوئے کہاکہ یہ سانحہ ہم سب کے لئے صدمہ کاباعث ہے، ہم سب ان کے اہل خانہ کے غم میں برابرکے شریک ہیں اوردعاکرتے ہیں کہ اللہ تعالیٰ علی رضا عابدی شہید کوجنت الفردوس میں جگہ دے اورتمام سوگواراہل خانہ کویہ ناقابل تلافی نقصان اورصدمہ برداشت کرنے کاحوصلہ اور صبر عطا کرے 

*****