مہاجروں کے سیاسی ، معاشی ، سماجی ، تعلیمی ، جسمانی قتل عام ، کارکنان کے گھروں و دفاتر پر غیر آئینی و غیر قانونی چھاپوں ، گرفتاریوں اور انسانی حقوق کی سنگین خلاف ورزیوں کے خلاف ایم کیوایم کی’’تادمِ مرگ بھوک ‘‘ ہڑتال دوسرے دن میں داخل ہوگئی

کراچی ۔۔۔18، اگست2016ء 

مہاجروں کے سیاسی ، معاشی ، سماجی ، تعلیمی ، جسمانی قتل عام ، کارکنان کے گھروں و دفاتر پر غیر آئینی و غیر قانونی چھاپوں ، گرفتاریوں اور انسانی حقوق کی سنگین خلاف ورزیوں کے خلاف متحدہ قومی موومنٹ کی کراچی پریس کلب کے باہر ’’تادمِ مرگ بھوک ‘‘ ہڑتال دوسرے دن میں داخل ہوگئی ۔ تادمِ بھوک ہڑتال پر ایم کیوایم کی رابطہ کمیٹی کے ارکان اسلم آفریدی ، ذاکر قریشی ، حق پرست رکن سندھ اسمبلی یوسف شاہوانی ، ایم کیوایم سینٹرل ایگزیکٹو کونسل کے رکن رفیع اکبر ، متحدہ آرگنائزنگ کمیٹی کے ارکان اسد اللہ خان اور وسیم احمد ترک 17اگست 2016بروزبدھ کی شب 8بجے بیٹھے تھے اور انہیں بھوک ہڑتال پر بیٹھے ہوئے جمعرات دوپہر12بجے تک 17گھنٹے ہوچکے ہیں ۔اس موقع پر ایم کیوایم کی رابطہ کمیٹی کے اراکین محمد حسین ، رکن الدین تاج ، فیض محمد فیضی ، اکرم راجپوت ، ساتھی اسحاق سمیت حق پرست اراکین قومی وصوبائی اسمبلی، خواتین ، ایم کیوایم کے ذمہ داران و کارکنان کی بڑی تعداد موجود تھی ۔تادم مرگ بھوک ہڑتال کے دوسرے دن رابطہ کمیٹی کے اراکین نے بھوک ہڑتال پر بیٹھے ہوئے افراد کو پھولوں کے ہار پہنائے اور ان کے جذبے اور ہمت کو سراہا ۔ بھوک ہڑتالی کیمپ کے شرکاء نے اپنے ہاتھوں میں پلے کارڈز بھی اٹھا رکھے تھے جن پر ’’ایم کیو ایم کے تمام لاپتہ کارکنان کو فوری بازیاب کیا جائے‘‘ ، ’’ایم کیو ایم کو دیوار سے لگانے کا عمل بند کرو ۔۔۔ بند کرو‘‘ ، ’’شکست حق کا مقدر تو ہو نہیں سکتی‘‘ ، ’’ہمارے قائد کے خطاب سے پابندی ہٹائی جائے‘‘ ، ’’ایم کیو ایم کی سماجی و سیاسی سرگرمیوں پر قدغن ۔۔۔ نامنظور ۔۔۔ نامنظور‘‘ ، ’’ایم کیو ایم کو کچلنے اور ختم کرنے کی سازش بند رکرو‘‘ اور دیگر کلمات اور مطالبات درج تھے۔

مزید تصاویر