ایم کیوا یم رابطہ کمیٹی کا خضدار میں مسافر بس اور ٹرک کے ہولناک تصاد م میں قیمتی انسانی جانوں کے زیاں پرافسوس کا اظہار

کراچی ۔۔۔19دسمبر 2015ء

ایم کیوایم کی رابطہ کمیٹی نے خضدار کے علاقے اورناچ کے قریب مسافر بس اور ٹرک میں ہولناک تصاد م کے نتیجے میں متعدد افرا د کے جاں بحق اور درجنوں کے زخمی ہونے پر گہرے دکھ کا اظہار کیا ہے۔ایک بیان میں رابطہ کمیٹی نے کہاکہ ملک میں ہر سال سینکڑوں افراد ٹریفک حادثات کا شکار ہوکر اپنی جانوں سے ہاتھ دھو بیٹھتے ہیں لیکن حکومت کی جانب سے ٹریفک حادثات کو روکنے کیلئے کسی قسم کے اقدامات نہیں کئے جارہے ۔انہوں نے کہاکہ ٹریفک حادثات میں قیمتی انسانی جانوں کے زیاع کے سدباب کیلئے ضروری ہے کہ ٹرک اور مسافر بس کے ڈرائیوروں کو قانون کا پابند بنایا جائے اور بغیر لائسنس اور ٹریفک قوانین کی خلاف ورزی کرنے والے مسافر کوچ ،ٹرک اور مال بردار گاڑیوں کے ڈرائیور اورمالکان کے خلاف سخت کارروائی کی جائے۔رابطہ کمیٹی نے وزیر اعظم پاکستان میاں محمد نواز شریف اور وزیر اعلیٰ بلوچستان ڈاکٹر عبد المالک بلوچ سے مطالبہ کیاہے کہ وہ خضدار میں پیش آنیوالے افسوسناک ٹریفک حادثے کے ذمہ داروں کے خلاف کارروائی عمل میں لائیں اور حادثے کے زخمیوں کو سرکاری سطح پر علا ج ومعالجے کی سہولیات فراہم کریں۔