ایم کیو ایم رابطہ کمیٹی کی عیسیٰ نگری میں ڈان نیوز کی ڈی ایس این جی وین پر فائرنگ کی سخت الفاظ میں مذمت
شہر میں جاری ٹارگٹڈ آپریشن کے دوران صحافیوں پر فائرنگ کے متعدد واقعات پیش آچکے ہیں، رابطہ کمیٹی
قانون نافذ کرنیوالے ادارے تاحال صحافیوں پر حملے کرنیوالے کسی دہشت گرد یا اسکے سرپرستوں کو گرفتار نہیں کرسکے، رابطہ کمیٹی
مختلف علاقوں سے ایم کیوایم کے بیگناہ کارکنان اور ہمدردوں کو بلاجواز گرفتار کیا جارہا ہے،تنظیمی و انتخابی دفاتر پر چڑھائی کی جارہی ہیں، رابطہ کمیٹی
وزیر اعظم پاکستان ، وفاقی وزیر داخلہ ،وزیر اعلیٰ اور صوبائی وزیرداخلہ واقعہ کا نوٹس لیکر ملوث دہشت گردوں کو فی الفور گرفتار کروائیں، ایم کیوا یم رابطہ کمیٹی کا مطالبہ
کراچی ۔۔۔27نومبر 2015ء
متحدہ قومی موومنٹ کی رابطہ کمیٹی نے کراچی کے علاقے عیسیٰ نگری میں ڈان نیوز کی ڈی ایس این جی وین پر نامعلوم مسلح دہشت گردوں کی شدید فائرنگ کی سخت الفاظ میں مذمت کی ہے ۔ایک مذمتی بیان میں رابطہ کمیٹی نے کہاکہ شہر میں جاری ٹارگٹڈ آپریشن کے دوران صحافیوں پر فائرنگ کے متعدد واقعات پیش آ چکے ہیں جس میں سینئر صحافی آفتاب عالم کی شہادت کا واقعہ بھی شامل ہے لیکن قانون نافذ کرنیوالے ادارے تاحال صحافیوں پر حملے کرنیوالے کسی دہشت گرد یا اسکے سرپرستوں کو گرفتار نہیں کیا گیا ہے۔انہوں نے کہا کہ شہر کے مختلف علاقوں سے ایم کیوا یم کے بیگناہ کارکنان اور ہمدردوں کو بلاجواز گرفتار کیا جارہاہے اور ایم کیوا یم کے تنظیمی و انتخابی دفاتر پر چڑھائیاں کی جارہی ہیں لیکن کالعدم اور دہشت گرد جماعتوں کو شہر میں کھلے عام سرگرمیوں کی اجازت دی گئی ہے ۔ رابطہ کمیٹی نے وزیر اعظم پاکستان میاں محمد نواز شریف ، وفاقی وزیر داخلہ چوہدری نثار علی خان ، وزیر اعلیٰ سندھ سید قائم علی شاہ اور صوبائی وزیر داخلہ سہیل انورسیال سے مطالبہ کیا ہے کہ وہ ڈان نیوز کی ڈی ایس این جی وین پر نامعلوم دہشت گردوں کی فائرنگ کے واقعہ کا فی الفور نوٹس لیکر ملوث عناصر کی گرفتاریوں کے احکامات جاری کریں اور اس سے قبل بھی صحافیو ں پر حملوں اور قتل میں ملوث اصل مجرمان کو فوری گرفتار کرکے انہیں قانون کے کٹہرے میں لایا جائے۔رابطہ کمیٹی نے فائرنگ کے نتیجے میں زخمی ہونیوالے ڈان نیوز کے کارکن کی جلد و مکمل صحتیابی کیلئے دعا بھی کی ہے۔