سندھ کو مسائلستان بنادیاگیا ہے،بلدیاتی انتخابات جیت کر کراچی سمیت سندھ بھرمیں ترقیاتی کام کریں گے ، ڈاکٹر محمد فاروق ستار

میرپورخاص۔۔۔15نومبر2015ء

متحدہ قومی موومنٹ کے سینئر رہنما ڈاکٹر محمد فاروق ستار نے کہا ہے کہ بلدیاتی انتخابات کے بعد ایم کیوایم عوام کی بھلائی ،کرپشن کے خاتمے اور منتخب بلدیاتی اداروں کو بااختیار اور مضبوط بنانے کی تحریک شروع کریگی ،بلدیاتی انتخابات سات سال قبل ہونا چاہئے تھے جس میں تاخیر کی ذمہ دار پیپلزپارٹی ہے ۔ان خیالات کا اظہار انہوں نے میرپورخاص کے مہاجرکالونی گراؤنڈ میں بلدیاتی انتخابات کے سلسلے میں جلسہ عام سے قبل پریس کانفرنس سے خطاب کرتے ہوئے کیا۔انہوں نے کہا کہ پیپلزپارٹی والے صوبائی حکومت ،سرکاری مشینری وڈیروں اور بااثر شخصیات کے ذریعے بلدیاتی انتخابات جیتنا چاہتی الیکشن کمیشن اس کانوٹس لیتے ہوئے عوام کو اپنا حق رائے دہی استعمال کرنے کا آزادانہ ماحول فراہم کرنا چاہئے ،اگر پولنگ کے موقع پر کسی بھی طریقے سے عوام کو ان کے ووٹ دینے کے حق سے محروم کیا گیا تو عوامی رد عمل بھی سامنے آسکتا ہے ۔انہوں نے کہا یہ تاثر ابھی بھی ہے کہ ایم کیو ایم کے میدان کو چھین کر کسی اور کو دینے کی سازش کی جارہی ہے ،ایم کیوایم آج بھی عوام کے دلوں میں موجود ہے جس کاثبوت کراچی میں ہونے والا قومی اسمبلی کا ضمنی انتخاب اور کنٹونمنٹ بورڈ کے انتخابی نتائج ہیں انہوں نے کہا کہ بلدیاتی انتخابات میں بھی ایم کیو ایم ریکارڈ کامیابی حاصل کرے گی ،عوام نے اپنا فیصلہ دیدیا ہے ،کراچی کے علاوہ حیدرآباد ،میرپورخاص اور نواب شاہ کا میئراور چیئر مین بھی ایم کیوایم کا ہوگا۔انہوں نے کہا کہ نواز شریف سے 160ارب روپے حساب مانگنے والے پہلے 420ارب روپے کا حساب دیں یوں محسوس ہوتا ہے کہ 420ارب روپے چارسوبیسی کرنے والوں کو دیدئے گئے ہیں یہ رقم کہاں خرچ ہوئی ہے پورا سندھ مسائلستان بنا ہوا ہے ،انہوں نے کہا کہ ہم کراچی کے ساتھ ساتھ سندھ کے دیگر شہروں اور دیہاتوں میں بھی ترقی لائیں گے ۔