بلدیاتی انتخابات کے نتائج ایم کیوا یم کے سیاسی مخالفین کے تابوت میں آخری کیل ثابت ہوں گے، طارق جاوید

میرپورخاص۔۔۔۔9نومبر2015ء

ایم کیوا یم کی سینٹرل ایگزیکٹو کمیٹی کے رکن طارق جاوید، اراکین سندھ تنظیمی کمیٹی ظفر خان، رشید بھیا، پونجو مل بھیل ایڈوکیٹ، محترمہ عشرت بیگم اور ایم کیو ایم میرپورخاص زون کے زونل انچارج مجیب الحق نے بلدیاتی انتخابات کے سلسلے میں شہر کے مختلف وارڈزمیں منعقدہ کارنر میٹنگز میں شریک حق پرست عوام سے خطاب کرتے ہوئے کہا کہ ایم کیو ایم جمود شکن تحریک ہے اور ملک میں حقیقی جمہوریت کے قیام کے لئے عملاً جدوجہد کررہی ہے۔ 19نومبر کو حق پرست عوام اپنا حق رائے دہی استعمال کرتے ہوئے استحصالی عناصر کو شکست فاش دیں گے۔بلدیاتی انتخابات کے نتائج سازشی عناصر کے تابوت میں آخری کیل ثابت ہوں گے۔ایم کیو ایم عوامی جماعت ہے اور سیاست برائے خدمت پر یقین رکھتی ہے ۔ایم کیو ایم نے اپنے قیام سے لے کر آج تک ملکی ترقی و خوشحالی اور عوامی مسائل کے حل کے لئے وہ کارہائے نمایاں انجام دیئے جس کی مثال تاریخ میں نہیں ملتی ۔حق پرست عوامی نمائندے عوامی خدمت کے مثالی اقدامات بروئے کار لاکر علاقائی مسائل کے فوری حل اور عوامی محرومیوں کا خاتمہ یقینی بنائیں گے۔ انہوں نے کہا کہ سازشی عناصر منفی ہتھکنڈوں کے ذریعے عوام کو دھوکا نہیں دے سکتے۔عوام سازشی عناصر کے زہریلے پروپیگنڈے اور منفی ہتھکنڈوں سے باخبر ہیں،بلدیاتی انتخابات میں حق پرست امیدواران کی بھاری اکثریت سے کامیابی سازشی عناصر کی سیاسی حیثیت سب پر آشکار کردے گی۔دریں اثناء مختلف وارڈز میں حق پرست امیدواران کے الیکشن دفاتر کا افتتاح کیا گیا۔اس موقع پر حق پرست عوام نے اراکین رابطہ کمیٹی، اراکین سندھ تنظیمی کمیٹی اور ایم کیو ایم میرپورخاص زون کے انچارج و اراکین زونل کمیٹی کا پرجوش استقبال کیا ۔ان پر پھولوں کی پتیاں نچھاور کیں اور ہار پہنائے۔