خدمت خلق فاؤنڈیشن کی جانب سے پانچ کنٹینروں پر مشتمل کروڑوں روپے مالیت کا امدادی سامان جلوزئی کیمپ میں خیبر پختوا پی ڈی ایم اے کے عہدیداران کے حوالے کردیا گیا

کراچی ۔۔۔5، نومبر2015ء 

ایم کیوایم کے فلاحی ادارے خدمت خلق فاؤنڈیشن کی جانب سے خیبرپختونخوا کے زلزلہ متاثرین کیلئے کروڑوں روپے کی مالیت کے 5کنٹینروں پر مشتمل امدادی سامان خیبرپختونخوا پرونشنل ڈیزاسٹر مینجمنٹ اتھارٹی ’’پی ڈی ایم اے ‘‘ کے عہدیداران کے حوالے کردیا گیا ۔ امدادی سامان کے یہ کنٹینرز آج خدمت خلق فاؤنڈیشن کی جانب سے حق پرست سینیٹرز میاں عتیق ، بیرسٹر محمد علی سیف ، حق پرست رکن قومی اسمبلی و ٹرسٹی کے کے ایف خواجہ سہیل منصور اور حق پرست رکن سندھ اسمبلی و ٹرسٹی کے کے ایف ارشد وہرا نے پی ڈی ایم اے کے عہدیداران شوکت یوسف زئی ، ایڈیشنل سیکریٹری اور ڈی جی سے ملاقات کے بعد ان کے حوالے کئے ۔ کروڑوں روپے کے امدادی سامان کے کنٹینروں میں بھاری مقدار میں راشن ، چاول ، دالیں ، گھی ، تیل ، خشک دودھ ، منر ل واٹر ، رضائیاں ، کمبل ، خیمے اور ضروریاتی زندگی کی دیگر اشیاء شامل ہیں ۔ملاقات میں ایم کیوایم کے رہنماؤں نے پی ڈی ایم اے حکام کو خدمت خلق فاؤنڈیشن کی جانب سے بڑے پیمانے پر امدادی سرگرمیوں سے آگاہ کیا ۔اس موقع پر پی ڈی ایم اے کے عہدیداران نے زلزلہ متاثرین کے امداد سامان خود چل کر لے کر آنے کے عمل کو سراہا یا اور زلزلہ متاثرین کی امداد و بحالی کیلئے ایم کیوایم کے جذبے کی تعریف کی ۔ پی ڈی ایم اے کے عہدیداران نے زلزلہ متاثرین کیلئے امدادی سامان کی بھاری کھیپ بھیجنے پر قائد تحریک جناب الطاف حسین سے دلی تشکر کااظہار بھی کیا ۔ واضح رہے کہ جلوزئی کیمپ میں زلزلہ متاثرین کیلئے دیئے جانے والے پانچ کنٹینرز گزشتہ پانچ دن قبل کراچی میں خدمت خلق فاؤنڈیشن کے صدر دفتر میں قائم مرکزی امدادی کیمپ سے روانہ کئے گئے تھے جہاں پر زلزلہ متاثرین کیلئے امدادی سرگرمیاں بڑے پیمانے پر جاری ہیں ۔