ایم کیوایم رابطہ کمیٹی کی حق پرست نامزد چیئرمین کے امیداوار ریاض الدین کی سادہ لباس اہلکاروں کی جانب سے گرفتاری کی مذمت

کراچی ۔۔۔ 31 ؍ اکتوبر 2015ء

متحدہ قومی موومنٹ کی رابطہ کمیٹی نے ایم کیو ایم کے نامزد بلدیاتی امیدواران و کارکنان کی بلاجواز گرفتاریوں کی شدید الفاظ میں مذمت کرتے ہوئے کہا کہ انتخابات کے شیڈول کے اعلان کے بعد نامزد امیدواران کی گرفتاری قبل از انتخابات دھاندلی کے مترادف ہے۔ رابطہ کمیٹی نے کہا کہ UC-6 ملیر ڈسٹرکٹ سے چیئرمین کیلئے ایم کیو ایم کے حق پرست نامزد بلدیاتی امیدوار ریاض الدین ولد چھوٹے خان کو سادہ لباس اہلکاروں نے ان کی دوکان سے غیرقانونی طور پر حراست میں لے کر انھیں نامعلوم مقام پر منتقل کردیا ہے۔ رابطہ کمیٹی نے کہا کہ ایم کیوایم کو چھاپے و گرفتاریوں کے اوچھے ہتھکنڈے استعمال کرکے ہرگز خوفزدہ نہیں کیا جاسکتا ہے، ایم کیوایم غریب ومتوسط طبقے کی حکمرانی کیلئے اپنی پرامن ، سیاسی اور جمہوری جدوجہد جاری رکھے گی، اس جدوجہد کی پاداش میں ایم کیوایم ماضی میں بھی ماورائے عدالت قتل ، کارکنان کی جبری گمشدگی ،چھاپے و گرفتاریوں ، تشدد اور قید و بند کی صعوبتیں جھیل چکی ہے۔ رابطہ کمیٹی نے وزیراعطم نواز شریف ، وفاقی وزیر داخلہ چوہدری نثار علی خان ، وزیراعلیٰ سندھ قائم علی شاہ اور کراچی آپریشن کیلئے بنائی گئی شکایات ازالہ کمیٹی کے عہدیداران سے مطالبہ کیا کہ ایم کیو ایم کے نامزد بلدیاتی امیدوار ریاض الدین ولد چھوٹے خان کی سادہ لباس اہلکاروں کے ہاتھوں بلاجواز گرفتاری کا نوٹس لیاجائے اور ایم کیوایم کے بے گناہ ومعصوم کارکنان کے گھروں پر غیر قانونی چھاپوں کا سلسلہ بند کرایا جائے۔