کسی بھی جماعت کیلئے ایم کیوایم جیسی عوامی تحریک سے موازنہ کرنا قابل فخر بات ہے، گلفراز خٹک

کراچی ۔۔۔29، اکتوبر2015ء

متحدہ قومی موومنٹ کی رابطہ کمیٹی کے رکن گلفراز خان خٹک نے ایم کیوایم کے حوالہ سے عمران خان اور تحریک انصاف کے دیگر رہنماؤں کے بیانات پر تبصرہ کرتے ہوئے کہاہے کہ کسی بھی جماعت کیلئے ایم کیوایم جیسی عوامی تحریک سے موازنہ کرنااس جماعت کیلئے قابل فخر بات ہے ۔ ایک بیان میں گلفراز خان خٹک نے کہاکہ ایم کیوایم ،لاکھوں کروڑوں عوام کی منتخب جماعت ہے جسے عوام نے باربار مینڈیٹ دیکر اپنی نمائندگی کا حق دیا ہے اورایم کیوایم جیسی عوامی تحریک کا کسی بھی سیاسی جماعت سے موازنہ کرنا ، اس جماعت کیلئے قابل فخر بات ہے ۔ انہوں نے کہاکہ آج تک کسی بھی سیاسی جماعت کا موازنہ تحریک انصاف سے نہیں کیاجاتا، کسی بھی سیاسی جماعت کا تحریک انصاف سے موازنہ کرنا اس جماعت کیلئے باعث شرم سمجھا جاتا ہے کیونکہ تحریک انصاف میرجعفرومیرصادق کی عکاس ہے اور یہ جماعت میرجعفر ومیرصادق کا روپ ہے ۔گلفراز خان خٹک نے کہاکہ عمران خان نیازی اورپی ٹی آئی کے دیگر رہنماانتخابات میں جس جماعت سے عبرتناک شکست کھاتے ہیں اس کی برائیاں کرنے لگ جاتے ہیں ،یہی وجہ ہے کہ وہ این اے 246 میں ایم کیوایم اور این اے 144 کے ضمنی انتخابات میں مسلم لیگ (ن) سے شکست کھانے کے بعد ایم کیوایم اور مسلم لیگ (ن) بیانات دے رہے ہیں۔گلفراز خان خٹک نے کہاکہ پاکستان بھر کے حق پرست عوام باشعور ہیں اور انشاء اللہ آئندہ بلدیاتی انتخابات میں بھی بیمارذہنوں پر مشتمل تحریک انصاف کے سیاہ کرتوتوں کا جمہوری انداز میں جواب دیں گے۔