ایم کیوایم رابطہ کمیٹی لندن و پاکستان کا ہنگامی اجلاس ، ملک میں زلزلہ کے بعد درپیش صورتحال پر تفصیلی تبادلہ خیال اجلاس میں ایم کیوایم کے فلاحی ادارے خدمت خلق فاؤنڈیشن اور متعلقہ زونوں کو فی الفور زلزلہ متاثرین کیلئے امدادی کارروائیاں شروع کرنے کی ہدایت کی گئی

کراچی ۔۔۔26،اکتوبر2015ء 

متحدہ قومی موومنٹ کی رابطہ کمیٹی پاکستان اور لندن کا ایک ہنگامی اجلاس آج خورشید بیگم سیکریٹریٹ عزیز آباد میں ہوا جس میں ایم کیوایم لندن رابطہ کمیٹی کے اراکین نے بذریعہ ٹیلی فون شرکت کی ۔ اجلاس میں ملک میں آنے والے حالیہ زلزلہ کے بعد درپیش صورتحال کا تفصیلی جائزہ لیا گیا اورقائد تحریک جناب الطاف حسین کی ہدایت پرایم کیوایم کے فلاحی ادارے خدمت خلق فاؤنڈیشن اور متعلقہ زونوں کو فی الفور زلزلہ متاثرین کیلئے امدادی کارروائیاں شروع کرنے کی ہدایت دی گئی۔ اجلاس میں زلزلہ کے نتیجے میں متعدد افراد کے جاں بحق اور زخمی ہونے پر گہرے دکھ اور افسوس کااظہار کیا گیا ۔ اجلاس میں دعا کی گئی کہ اللہ تعالیٰ زلزلہ کے نتیجے میں جاں بحق افراد کو جنت الفردوس میں اعلیٰ مقام عطا فرمائے ، سوگواران کو صبر جمیل عطاکرے اور زخمیوں کو جلد ومکمل صحت یابی عطا فرمائے ۔ اجلاس میں کہا گیا کہ خدمت خلق ایم کیوایم کا نصب العین ہے اور ماضی میں آنے والے زلزلے اور قدرتی آفات میں ایم کیوایم اور اس کے فلاحی ادارے خدمت خلق فاؤنڈیشن کی امدادی سرگرمیوں کو آج بھی سراہا جاتا ہے لہٰذا ایم کیوایم کے کارکنان اور خدمت خلق فاؤنڈیشن کے رضا کار کراچی آپریشن میں ہونیو الی ظلم و زیادتی کے باوجود اپنے ہم وطنوں کی مددکیلئے نکلیں اور امدادی سرگرمیوں میں بڑ ھ چڑھ کر حصہ لیں ۔ اجلاس میں وفاقی اور صوبائی حکومتوں سے مطالبہ کیاگیا کہ زلزلہ کی تباہ کاریوں سے مزید افراد کی جانیں بچانے کیلئے فی الفور نیشنل ڈیزاسٹر مینجمنٹ سیل کو فعال کیا جائے ،اسپتالوں اور دیگر متعلقہ اداروں میں ایمرجنسی نافذ کی جائے اور زلزلہ متاثرین کی ہرممکن امداد اور علاج و معالجہ کیلئے مثبت اقدامات بروئے کارلائے جائیں ۔