ایم کیوایم کے تمام کارکنان اور خدمت خلق فاؤنڈیشن کے رضاکاراپنی مدد آپ کے تحت متاثرین زلزلہ کی مدد کریں، الطاف حسین

لندن۔۔۔26، اکتوبر2015ء

متحدہ قومی موومنٹ کے قائد جناب الطاف حسین نے ملک کے مختلف علاقوں میں ہولناک زلزلہ سے ہونے والی تباہ کاریوں اورجانی ومالی نقصانات پر دلی افسوس کااظہار کرتے ہوئے ایم کیوایم کے تمام عہدیداروں وکارکنان اور خدمت خلق فاؤنڈیشن کے رضاکاروں سے کہاہے کہ وہ اپنی مدد آپ کے تحت آگے بڑھ کر متاثرین زلزلہ کی مدد کریں۔اپنے ایک بیان میں جناب الطاف حسین نے کہاکہ خدمت خلق ، ایم کیوایم کا ہمیشہ سے شعار رہا ہے اور ماضی میں آنے والی قدرتی آفات اور سانحات کے موقع پر ایم کیوایم کے کارکنوں اور کے کے ایف کے رضاکاروں نے ان سانحات کے متاثرین کی امداد اور بحالی کیلئے ناقابل فراموش خدمات انجام دی ہیں۔ جناب الطاف حسین نے کہاکہ مجھے بخوبی اندازہ ہے کہ ایم کیوایم کے خلاف موجودہ آپریشن کی وجہ سے خدمت خلق فاؤنڈیشن شدید مالی بحران کا شکار ہے تاہم اس کے رضاکاروں اور ایم کیوایم کے رہنماؤں وکارکنوں سے کہتا ہوں کہ وہ جہاں جہاں بھی ہوں اپنی مددآپ کے تحت متاثرین زلزلہ کی بھرپورمدد کریں ۔ انہوں نے زلزلہ میں جاں بحق ہونے والے افراد کے سوگوارلواحقین سے دلی تعزیت وہمدردی کا اظہار کرتے ہوئے کہاکہ میں دعا گو ہوں کہ اللہ تعالیٰ مرحومین کی مغفرت فرمائے اور زخمیوں کو جلد صحت یاب کرے۔(آمین)