ڈینسوہال کی مدینہ میڈیکل مارکیٹ میں 24دکانوں کے تالے کاٹ کر لاکھوں روپے کی نقدی لوٹنے کی انہونی واردات پر سندھ رینجرز اور ڈی جی رینجرز بلال اکبر کوایم کیوایم کے قائدالطاف حسین کا زبردست خراج تحسین

لندن ۔۔۔ 26 اکتوبر 2015ء

متحدہ قومی موومنٹ کے قائد جناب الطاف حسین نے کراچی میں ڈینسوہال کی مدینہ میڈیکل مارکیٹ میں 24دکانوں کے تالے کاٹ کر لاکھوں روپے کی نقدی لوٹنے کے واقعہ کوتاریخی قراردیتے ہوئے سندھ رینجرز اور اس کے سربراہ ڈی جی رینجرز بلال اکبر کو اس شاندار، تاریخی اور انہونی واردات پر زبردست خراج تحسین پیش کیا ہے ۔اپنے ایک بیان میں انہوں نے کہاکہ کراچی میں رینجرزکی جانب سے دہشت گردوں اور جرائم پیشہ عناصر کے خلاف آپریشن جاری ہے جس کی کامیابی کے بہت دعوے کئے جارہے ہیں مگر شہرکے مرکزی کاروباری علاقے میں 24 دکانوں کولوٹنے کی اس بڑی واردات سے کراچی میں جاری آپر یشن کی کامیابی کے دعووں کی قلعی کھل گئی ہے۔بے شک اللہ تعالیٰ کے ہاں دیر ہے اندھیر نہیں ہے۔جناب الطاف حسین نے مطالبہ کیا کہ 24دکانوں کولوٹنے کی اس بڑی واردات کی ’’شاندار کامیابی‘‘ پررینجرز کی مستعدی اور چاک و چوبند ہونے پر جتنا خراج تحسین پیش کیا جائے اتنا کم ہے اوراس پر رینجرز کو انعامات سے نوازا جائے۔انہوں نے کہاکہ اگرچہ’’ نشان حیدر ‘‘ جنگ میں جرات وبہادری کے کارنامے انجام دیتے ہوئے شہیدہونے والے فوجیوں کیلئے مخصوص ہے لیکن ڈی جی رینجرز جنرل بلال اکبر جنہوں نے اس پر اس طرح کی غفلت کا مظاہر ہ کیا اورجاگتے ہوئے بھی سوتے رہے انہیں بھی شہید سمجھتے ہوئے اگر ’’ نشان حیدر‘‘ کے انعام سے نوازا جائے تو بے جانہ ہوگا۔