جیکب آباد میں ماتمی جلوس میں خودکش دھماکے میں ایم کیوایم کے تین کارکنوں سمیت 22 افراد کی شہادت ایک بڑا سانحہ ہے۔ الطاف حسین
ایسی کھلی دہشت گردی کی کارروائیاں کرنے والے دہشت گردوں کے خلاف کارروائی کے بجائے ایم کیوایم کو نشانہ بنایا جارہا ہے۔ الطاف حسین
معصوم و بے گناہ شہریوں کو جس طرح خون میں نہلایا گیا ہے اس سے ہر ایک کا دل دکھی اور خون کے آنسو رو رہا ہے
دھماکے میں شہید ہونے والے کارکنوں علی رضا، سکندر اور اصغرعلی اور دیگر تمام شہداء کے لواحقین سے دلی تعزیت کا اظہار
لندن۔۔۔ 23 اکتوبر 2015ء
متحدہ قومی موومنٹ کے قائدجناب الطاف حسین نے جیکب آباد میں ماتمی جلوس میں ہونے والے خودکش دھماکے کی شدیدالفاظ میں مذمت کی ہے اور واقعہ میں ایم کیوایم کے تین کارکنوں سمیت درجنوں افراد کے شہید وزخمی ہونے پر دلی افسوس کا اظہار کیا ہے۔ اپنے ایک بیان میں جناب الطاف حسین نے کہاکہ جیکب آباد کا واقعہ ایک بڑاسانحہ ہے جس میں ایم کیوایم کے تین کارکنان سمیت 22معصوم وبے گناہ عزاداران شہید ہوئے، معصوم عوام درندہ صفت دہشت گردوں کی دہشت گردی کا نشانہ بن رہے ہیں لیکن ایسی کھلی دہشت گردی کی کارروائیاں کرنے والے دہشت گردوں کے خلا ف کارروائی کے بجائے ایم کیو ایم کو نشانہ بنایا جارہا ہے۔ جناب الطاف حسین نے کہاکہ معصوم وبے گناہ شہریوں کوجس طرح خون میں نہلایاگیاہے اس سے ہرایک کادل دکھی اورخون کے آنسورورہاہے۔جناب الطاف حسین نے دھماکے میں شہید ہونے والے کارکنوں علی رضا ، سکندر اوراصغرعلی اوردیگرتمام شہداء کے لواحقین سے دلی تعزیت کا اظہار کرتے ہوئے کہاکہ مجھ سمیت ایم کیوایم کے تمام کارکنان آپ کے غم میں برابرکے شریک ہیں۔ انہوں نے دعاکی کہ اللہ تعالیٰ تمام شہداء کواپنی جواررحمت میں جگہ دے ، ان کے لواحقین کوصبرجمیل عطاکرے۔ انہوں نے زخمیوں کی بھی جلدصحتیابی کی دعاکی۔