بولان کے بعدجیکب آبادمیں خودکش دھماکے نے حکومت اورقانون نافذکرنے والےاداروں کے تمام دعووں کی قلعی کھول دی ہے ۔ ندیم نصرت

لندن۔۔۔ 23 اکتوبر 2015ء

متحدہ قومی موومنٹ کی رابطہ کمیٹی کے قائم مقام کنوینرندیم نصرت نے جیکب آبادکے علاقے لاشاری محلہ میں ماتمی جلوس میں ہونے والے خودکش دھماکے کی شدیدالفاظ میں مذمت کی ہے اورواقعہ میں ایم کیوایم کے تین کارکنوں سمیت درجنوں افرادکے شہیدوزخمی ہونے پر دلی افسوس کااظہارکیاہے ۔اپنے ایک بیان میں ندیم نصرت نے کہاکہ وفاقی وصوبائی حکومت اورقانون نافذکرنے والے اداروں کی جانب سے کراچی سمیت سندھ بھرمیں امن وامان کے قیام کے بلندوبانگ دعوے کئے جارہے ہیں اورمحرم الحرام کے موقع پر بھی سیکوریٹی کے بڑے بڑے دعوے کئے گئے ہیں لیکن گزشتہ روزبولان کی امام بارگاہ میں خودکش دھماکہ ہوا اور آج جیکب آبادمیں ماتمی جلوس میں خودکش دھماکہ ہوا جس میں ایم کیوایم کے تین کارکنوں علی رضا ، سکندر اوراصغرعلی سمیت 20سے زائد افرادشہیدہوگئے جبکہ درجنوں زخمی ہوگئے۔ دہشت گردی کے ان واقعات نے حکومت اورقانون نافذکرنے والے اداروں کے تمام دعووں کی قلعی کھول دی ہے ۔ ندیم نصرت نے کہاکہ کالعدم تنظیموں کے دہشت گردکھلے عام دہشت گردی کی کارروائیاں کررہے ہیں اورخودکش دھماکے کرکے انتہائی دھڑلے کے ساتھ ان خودکش دھماکوں کی ذمہ داریاں قبول کررہے ہیں لیکن ان کی بیخ کنی کے بجائے قانون نافذکرنے والے اداروں کاسارازور ایم کیوایم پر لگاہواہے جبکہ عوام کو ان دہشت گردوں کے رحم وکرم پر چھوڑدیاگیاہے ۔ ندیم نصرت نے کہاکہ جیکب آبادمیں ہونے والے اس واقعہ سے حکومت کی آنکھیں کھل جانی چاہئیں اوراسے چاہیے کہ زبانی دعوے کرنے کے بجائے شہریوں کی جان ومال کے تحفظ اوردہشت گردوں کی بیخ کنی کے لئے عملی اقدامات کرے۔ ندیم نصرت نے دھماکے میں شہیدہونے والے ایم کیوایم کے کارکنوں علی رضاشہید ، سکندرشہید اوراصغرعلی شہید سمیت تمام شہداء کے لواحقین سے دلی تعزیت کا اظہار کیااورزخمیوں کی جلدصحتیابی کے لئے دعاکی ۔