محرم الحرام میں فرقہ وارانہ ہم آہنگی کے فروغ کیلئے ایم کیوایم رابطہ کمیٹی کے ارکان عارف خان ایڈووکیٹ اور عبد القادر خانزادہ کی معروف عالم دین علامہ ضمیر اختر نقوی اور ممتاز عالم دین حاجی حنیف طیب سے علیحدہ علیحدہ ملاقات

کراچی ۔۔۔19، اکتوبر2015ء 

متحدہ قومی موومنٹ کی رابطہ کمیٹی کے ارکان عارف خان ایڈووکیٹ اور عبد القادر خانزادہ نے محرم الحرام میں فرقہ وارانہ ہم آہنگی اور مذہبی رواداری کے فروغ کیلئے گزشتہ روز معروف عالم دین علامہ ضمیر اخترنقوی اور ممتاز عالم دین حاجی حنیف طیب سے علیحدہ علیحدہ ملاقات کی اور محرم الحرام کے دوران امن وامان کے قیام اور فرقہ وارانہ ہم آہنگی برقرار رکھنے پر تبادلہ خیال کیا ۔ ایم کیوایم کی علماء کمیٹی کے انچارج جاوید احمد ،علماء کمیٹی کے اراکین اور حق پرست رکن سندھ اسمبلی انور رضا بھی ان کے ہمراہ تھے ۔علامہ ضمیر اختر نقوی اور حاجی حنیف طیب نے رابطہ کمیٹی کے ارکان سے گفتگو کرتے ہوئے کہاکہ محرم الحرام کے مہینے میں قائد تحریک جناب الطاف حسین کی جانب سے تمام مکاتب فکر سے تعلق رکھنے والے علمائے کرام کے رابطوں اور ان کی مشاورت کا عمل قابل تحسین ہے اور جناب الطاف حسین کا یہ عمل فرقہ وارانہ ہم آہنگی کے فروغ کیلئے اہم سنگین کی حیثیت رکھتا ہے ۔ انہوں ں نے کہاکہ محرم الحرام احترام کا مہینہ ہے اور اس مہینے میں مسلم امہ کے مسالک کے درمیان تضاد پیدا کرنے والے ہم میں سے نہیں ہیں اور اس کے برعکس الحمد اللہ آج جناب الطاف حسین کی کاوشوں سے تمام مکاتب فکر کے علمائے کرام اور عوام میں جو فرقہ وارانہ ہم آہنگی پائی جاتی ہے اسے اب کوئی بھی سازش سبوتاژ نہیں کرسکتی ۔ انہوں نے تمام مکاتب فکر سے تعلق رکھنے والے علمائے کرام اور عوام سے اپیل کی کہ وہ محرم الحرام کے دوران شر انگیز عناصر پر نظر رکھیں اور فرقہ وارانہ ہم آہنگی کی فضا ء کو سبوتاژ کرنے والے عناصر کے خلاف سیسہ پلائی ہوئی دیوار کا کردار ادا کریں ۔ انہوں نے جناب الطاف حسین کی درازی عمر ، صحت وتندستی اور عافیت کیلئے اللہ تعالیٰ کے حضور خصوصی دعا بھی کی ۔