شکار پور کی بااثر شخصیت کی جانب سے کراچی کے علاقے بھنگوریہ گوٹھ سے تین نوجوان لڑکیوں کو اغواء کے بعد حراست میں رکھنے پر ایم کیوایم شعبہ خواتین کی انچارج و رکن قومی اسمبلی کشور زہرا کا اظہار مذمت
سندھ میں وڈیروں ، جاگیرداروں اور بااثر افرا دکی جانب سے ایسے واقعات معمول بن گئے ہیں ، حکومت کارروائی کرے ، کشور زہرا
کراچی ۔۔۔19، اکتوبر2015ء
متحدہ قومی موومنٹ شعبہ خواتین کی انچارج اور رکن قومی اسمبلی کشو ر زہرہ نے شکار پور کی بااثر شخصیت کی جانب سے کراچی کے علاقے بھنگوریہ گوٹھ سے تین نوجوان لڑکیوں کو اغواء کے بعد حراست میں رکھنے کی مذمت کی ہے ۔ ایک مذمتی بیان میں کشور زہرہ نے کہاکہ سندھ میں وڈیروں، جاگیرداروں اور بااثر شخصیات کی جانب سے مظلوموں اور خواتین کو حراست میں رکھنے کے واقعات معمول بن چکے ہیں لیکن حکومت کی جانب سے ان واقعات کو روکنے کیلئے کوئی خاطر خواہ اقدامات نہیں کئے جارہے ہیں ۔ انہوں نے وزیراعلیٰ سندھ سید قائم علی شاہ سے مطالبہ کیاکہ وہ بھنگوریہ گوٹھ سے اغواء کے بعد شکار پور میں حبس بے جا میں رکھی جانے والی تینوں لڑکیوں کو فی الفور بازیاب کروائیں اور ان کے اغواء میں ملوث افراد کے خلاف سخت کارروائی کریں۔