ایم کیوایم کی جانب سے لال قلعہ گراؤنڈ عزیز آباد میں بلدیاتی امیدواران کے انٹرویوز کا سلسلہ جاری ہے

کراچی ۔۔۔29، ستمبر2015ء 

بلدیاتی الیکشن 2015ء کے سلسلے میں متحدہ قومی موومنٹ کی جانب سے لال قلعہ گراؤنڈ عزیز آباد میں بلدیاتی امیدواران کے انٹرویوز کا سلسلہ جاری ہے ۔ اس سلسلے میں لال قلعہ گراؤنڈ عزیز آباد میں لگائے گئے کیمپ میں زبردست گہما گہمی دکھائی دے رہی ہے ۔ ایم کیوایم سینٹرل ایگزیکٹوکونسل اورالیکشن سیل کے اراکین حق پرست پینل کے امیدواران کے فارم کی جانچ پڑتال کا کام مسلسل انجام دے رہے ہیں اور بلدیاتی امیدواران کی فہرستیں مرتب کرنے میں مصروف ہیں ۔ لال قلعہ گراؤنڈ عزیز آباد میں ایم کیوایم کی رابطہ کمیٹی کے اراکین نے حق پرست پینل کے لئے نامزد کئے گئے امیدواران کے انٹرویوز لئے اور انہیں حتمی شکل دی ۔ اس موقع پر گفتگو کرتے ہوئے ایم کیوایم کی رابطہ کمیٹی کے اراکین نے کہا کہ بلدیاتی الیکشن کیلئے عوام میں سے ہی اچھی شہرت اور قابلیت رکھنے والے افراد کا چناؤ کیاجارہا ہے جو عوامی مسائل اور مشکلات کے حل کیلئے اپنی تمام صلاحیتوں کا استعمال کریں گے ۔ رابطہ کمیٹی کے اراکین نے بلدیاتی امیدواران کو تلقین کی کہ قائد تحریک جناب الطاف حسین عوامی مسائل اور ان کے حل کیلئے کسی قسم کی غفلت اور لاپروائی کے مظاہرے کو برداشت نہیں کرسکتے لہٰذا حق پرست امیدواران منتخب ہونے کے بعد جناب الطاف حسین کی امیدوں پر پورا اترنے کی بھر پوراور عملی کوششیں کریں