مسلح دہشت گردوں کی سماء نیوز کی ڈی ایس این جی وین پر فائرنگ کے واقعہ پر رابطہ کمیٹی کااظہار مذمت

کراچی ۔۔۔20، ستمبر2015ء 

متحدہ قومی موومنٹ کی رابطہ کمیٹی نے لیاقت آباد نمبر 10میں سماء نیوز کی ڈی ایس این جی وین پر مسلح دہشت گردوں کی فائرنگ کی سخت ترین الفاظ میں مذمت کی ہے اور کہا ہے کہ شہر میں میڈیا کی گاڑیوں ، صحافیوں اور عملے کو نشانہ بنانے کے واقعات آزادی صحافت پر کھلا حملہ ہے ۔ ایک بیان میں رابطہ کمیٹی نے کہاکہ اس سے قبل بھی دیگر نیوز چینلز کی گاڑیوں پر فائرنگ ، عملے کو نشانہ بنانے اور صحافیوں کو قتل کرنے کے واقعات رونما ہوچکے ہیں لیکن ان واقعات میں ملوث سفاک ملزمان اب تک قانون کی گرفت سے محفوظ ہیں جس کی جتنی بھی مذمت کی جائے کم ہے۔ رابطہ کمیٹی مزید کہاکہ جو عناصر شہر میں میڈیا کی گاڑیوں اور ان سے وابستہ افراد کو نشانہ بنارہے ہیں وہ اپنے خلاف حقائق سامنے آنے سے خوف زدہ ہیں اور اسی لئے کھلی دہشت گردی کا مظاہرہ کررہے ہیں ۔ رابطہ کمیٹی نے وزیر اعظم نواز شریف ، وفاقی وزیر داخلہ چوہدری نثار علی خان اور وزیراعلیٰ سندھ قائم علی شاہ سے مطالبہ کیا کہ سماء نیوز کی ڈی ایس این جی وین پر فائرنگ کے واقعہ کا سختی سے نوٹس لیاجائے اور اس میں ملوث عناصر کو فی الفور گرفتار کرکے قرار واقعی سزا دی جائے ۔