سینئر صحافی آفتاب عالم کے بہیمانہ قتل پر ایم کیوا یم رابطہ کمیٹی کا اظہار مذمت

کراچی ۔۔۔9ستمبر2015ء

متحدہ قومی موومنٹ کی رابطہ کمیٹی نے نامعلوم مسلح ملزمان کی جانب سے سینئر صحافی آفتاب عالم کے بہیمانہ قتل کی سخت الفاظ میں مذمت کی ہے۔ایک مذمتی بیان میں رابطہ کمیٹی نے کہا کہ شہر میں گزشتہ 2سالوں سے جاری ٹارگٹ آپریشن کے دوران پولیس ، صحافیوں ، سماجی رہنماؤں سمیت اعلیٰ شخصیات کو ٹارگٹ کلنگ کا نشانہ بنایا گیا ہے جبکہ اسی آپریشن کے دوران ایم کیو ایم کے سینئر رکن رشید گوڈیل پر فائرنگ اور سانحہ صفورا کا افسوسناک واقعہ بھی پیش آیا ہے لیکن قانون نافذ کرنیوالے اداروں کے اہلکار ان تمام ہائی پروفائل واقعات میں ملوث مجرمان اور انکے سرپرستوں کو گرفتار کر نے میں ناکام ہیں ۔رابطہ کمیٹی نے کہاکہ گذشتہ رات بہادر آباد کے علاقے میں نجی نیوز چینل کی سیٹلائٹ وین کو روک کر فائرنگ کی گئی جس میں سیٹلائٹ انجینئر ارشد علی جعفری جاں بحق اور وین کا ڈرائیور شدید زخمی ہوا اور چوبیس گھنٹوں کے دوران صحافی برادری پر حملے کا دوسرا افسوسناک واقعہ کراچی آپریشن کے کپتان اور شہر میں امن و امان کے بڑے بڑے دعوے کرنیوالے افسران کی کارکردگی پر سوالیہ نشان ہے۔رابطہ کمیٹی نے گزشتہ رات جاں بحق ہونیوالے سیٹلائٹ انجینئر ارشد علی جعفری اور سینئر صحافی آفتاب عالم کے اہل خانہ ، صحافی برادری سمیت انکے پسماندگان سے دلی ہمدردی اور تعزیت کا اظہار کرتے ہوئے دعاکی کہ اللہ تعالیٰ دونوں مرحومین کو اپنی جوار رحمت میں جگہ عطا فرمائے اور پسماندگان کو یہ صدمہ برداشت کرنے کی ہمت عطا کرے ۔رابطہ کمیٹی نے وزیر اعظم پاکستان میاں محمد نواز شریف، وفاقی وزیر داخلہ چوہدری نثار علی خان اور دیگر متعلقہ حکام شہر میں پیش آنیوالے افسوسناک واقعات کی فوری تحقیقات کرکے ملوث ملزمان کو کیفر کردار تک پہنچائیں۔