اورنگی ٹاؤن میں مسلح دہشت گردوں نے فائرنگ کرکے ایم کیوایم کے سرکل انچارج عبدالرحیم کوشہیدکردیا

کراچی ۔۔۔ 18 اگست 2015ء

کراچی کے علاقے اورنگی ٹاؤن میں مسلح دہشت گردوں نے فائرنگ کرکے ایم کیوایم کے سرکل انچارج عبدالرحیم کوشہیدکردیا۔ تفصیلات کے مطابق اورنگی ٹاؤن سیکٹریونٹ 124کے سرکل انچارج عبدالرحیم ولد معین الدین آج ایم کیوایم کے شہیداورلاپتہ کارکنوں کے اہل خانہ کو نائن زیرو پرلے جانے کے سلسلے میں سرگرم تھے۔بعدازاں وہ ڈی ایم سی ویسٹ میں واقع پر اپنے آفس جارہے تھے کہ اردوچوک کے مقام پر موٹرسائیکل پرسواردہشت گردوں نے ان پر فائرنگ کی جس کے نتیجے میں عبدالرحیم شدیدزخمی ہوگئے۔ وہ شدیدزخمی حالت میں قریب ہی واقع چھیپاکے ایمبولینس سینٹر پہنچے ۔انہیں ایمبولینس میں اسپتال لے جایاجارہاتھاکہ دہشت گردوں نے ایمبولینس پر دوبارہ فائرنگ کردی جس کے نتیجے میں عبدالرحیم موقع پر ہی شہیدہوگئے جبکہ ایمبولینس کاڈرائیوربھی شدید زخمی ہوگیا جسے مقامی اسپتال لے جایاگیا۔عبدالرحیم شہیدکی عمر 30 سال تھی ۔ وہ شادی شدہ تھے اوران کے تین بچے ہیں۔واضح رہے کہ دوروزقبل بھی اتوار16 اگست کو اورنگی ٹاؤن کے علاقے ولایت علی شاہ کالونی میں ایم کیوایم کے کارکن اکرم شہیدخان کے بھائی نعمان خان کوبھی اس وقت فائرنگ کرکے شہیدکردیاتھا جب وہ علاقے میں واقع عثمانیہ مسجدسے نمازعشاء پڑھ کرگھرجارہے تھے ۔ اورنگی ٹاؤن کے علاقے میں اس سے قبل بھی اس طرح کے کئی واقعات میں ایم کیوایم کے کئی کارکنوں کوشہیدکیاجاچکاہے ۔