ایم کیوایم کے رکن قومی اسمبلی رشید گوڈیل پر قاتلانہ حملے کی اطلا ع ملتے ہی رابطہ کمیٹی اور حق پرست اراکین اسمبلی اسپتال پہنچ گئے

کراچی ۔۔۔18، اگست2015ء 

متحدہ قومی موومنٹ کے رکن قومی اسمبلی رشید گوڈیل کے قاتلانہ حملے میں شدیدزخمی ہونے کی اطلاع ملتے ہی ایم کیوایم کی رابطہ کمیٹی کے ارکان عبد الحسیب ،شبیر قائم خانی محمد حسین حق پرست اراکین قومی وصوبائی اسمبلی کے ہمراہ اسپتال پہنچ گئے۔ رابطہ کمیٹی کے ارکان اور حق پرست اراکین پارلیمنٹرین نے اسپتال کے ڈاکٹروں اور عملے سے ملاقات کی اور ان سے رشیدگوڈیل کی صحت سے متعلق معلومات حاصل کی ۔ اس موقع پر انہوں نے ڈاکٹروں اور عملے کے اراکین کو ہدایت کی کہ وہ رشید گوڈیل کی زندگی بچانے کیلئے کوئی کسر باقی نہ چھوڑیں ۔ انہوں نے اس موقع پر رشیدگوڈیل کے اہل خانہ اور کارکنان سے بھی ملاقات کی اور انہیں دلاسی دیا ۔ اس موقع پر رابطہ کمیٹی کے اراکین اور حق پرست اراکین پارلیمنٹرین نے رشید گوڈیل کی جلد و مکمل صحت یابی کیلئے اللہ تعالیٰ کے حضور خصوصی دعائیں بھی کیں ۔ 

دریں اثناء اسپتال کے باہر میڈیا کے نمائندگان سے گفتگو کرتے ہوئے ایم کیوایم کی رابطہ کمیٹی کے رکن محمد حسین نے کہاکہ رشید گوڈیل پر قاتلانہ حملہ کھلی دہشت گردی اور بزدلانہ کاروائی ہے اور ملک میں سیاسی و جمہوری عمل میں رکاوٹ ڈالنے کی گھناؤنی سازش ہے ۔ انہوں نے کہا کہ عوام کے لاکھوں ووٹوں سے منتخب ہونے والے نمائندے جب کراچی میں محفوظ نہیں تو امن و امان کے دعوؤں کی سچائی کا اندازہ لگایاجاسکتا ہے ۔ انہوں نے کہاکہ حکومت سے مطالبہ کیا کہ رشید گوڈیل پر قاتلانہ حملہ کی تحقیقات کرائی جائے اور اس میں ملوث دہشت گردوں کو فی الفور گرفتار کرکے کیفر کردار تک پہنچایا جائے ۔ دریں اثناء سابق حق پرست رکن قومی اسمبلی حیدر عباس رضوی نے اسپتال کے باہر میڈیا کے نمائندوں سے گفتگو کرتے ہوئے کہا کہ رشید گوڈیل کو جو گولیاں لگیں ہیں اس کے باعث ان کی حالت تشویش ناک ہے اور ڈاکٹروں کی رائے کے مطابق رشید گوڈیل کی زندگی کیلئے 48گھنٹے انتہائی اہم ہیں ۔ انہوں نے کہاکہ ایک ایسے موقع پر رشید گوڈیل پر قاتلانہ حملہ کیا گیا جب ایم کیوایم کے استعفوں کے معاملے پر ثالث کا کردار ادا کرنے والے مولانا فضل الرحمن نائن زیرو پر مذاکرات کررہے تھے ۔ انہوں نے دعا کی کہ اللہ تعالیٰ رشید گوڈیل کو صحت وتندرستی عطا فرمائے ۔