کراچی میں جعلی دودھ بنانے اورفروخت کرنے کے گھناؤنے دھندے پرایم کیوایم کے ارکان قومی اسمبلی کااظہار مذمت

کراچی ۔۔۔15، اگست2015ء 

متحدہ قومی موومنٹ کے ارکان قومی اسمبلی نے کراچی میں جعلی دودھ بنانے اورفروخت کرنے کے گھناؤنے دھندے کی سخت ترین الفاظ میں مذمت کی ہے اور مطالبہ کیا ہے کہ انسانی صحت کیلئے انتہائی مضر نقلی دودھ بنانے والی فیکٹریوں کو فی الفور بند کروایاجائے ۔ اپنے مشترکہ بیان میں انہوں نے کہاکہ دودھ انسانی صحت اور باالخصوص بچوں کیلئے انتہائی ضروری ہے اور دودھ کی کوالٹی بہتر بنانے کے بجائے جعلی دودھ بنانے اور فروخت کرنے کا مکروہ دھندے میں ملوث عناصر سنگین نوعیت کا مجرمانہ فعل کررہے ہیں جس کی جتنی بھی مذمت کی جائے کم ہے ۔ انہوں نے کہاکہ جعلی دودھ میں ایمونیم کی تعداد بہت زیادہ ہے جس سے لوگوں میں مختلف بیماریاں پیدا ہورہی ہے جبکہ یہ جعلی دودھ ایک طرح کا سلو پوائزن بھی ہے جس سے شہریوں اور باالخصوص بچوں کی زندگیوں کو شدید خطرات لاحق ہوچکے ہیں ۔ ارکان قومی اسمبلی نے وزیراعظم نواز شریف اور وزیراعلیٰ سندھ سید قائم علی شاہ سے مطالبہ کیا کہ کراچی میں جعلی دودھ بنانے کے دھندے میں ملوث عناصر کو فی الفور گرفتار کیاجائے ،جعلی دودھ کا نامور لیبارٹریوں سے ٹیسٹ کرایاجائے ، اس دھندے کی باقاعدہ تحقیقات کرائی جائے اور ملوث عناصر کو کڑی سے کڑی سزا دی جائے ۔