الطاف حسین کے کارکنان کی ہر اول دستے کا کردار ادا کرکے پاکستان کو بچائیں گے،ڈاکٹرمحمدفاروق ستار

کراچی۔۔۔13اگست2015ء

متحدہ قومی موومنٹ کی رابطہ کمیٹی کے رکن اور سابق رکن قومی اسمبلی ڈاکٹرمحمد فاروق ستار نے کہاہے کہ قائدتحریک جناب الطاف حسین کے کارکنان کی ہر اول دستے کا کردار ادا کرکے پاکستان کو بچائیں گے۔انہوں نے کہاکہ قیام پاکستان کے لئے ہمارے آباؤ اجداد نے لاکھوں جانیں دی اورخدانہ خواستہ کبھی پاکستان کی سلامتی کو خطرات لاحق ہواتوپاکستان بنانے والوں کی اولادیں اسے بچانے کے لئے اپنی جانیں قربان کرنے میں لمحہ بھردیرنہیں لگائیں گی۔ان خیالات کا اظہار انہوں نے 13اگست کی رات نارتھ ناظم آباد سیکٹر کے زیر اہتمام فائیو اسٹار چورنگی پر جشنِ آزادی کے سلسلے میں لگائے گئے استقبالیہ کیمپ پر جمع ہونیوالے شرکاء سے خطاب کرتے ہوئے کیا۔اس موقع پر ارکان رابطہ کمیٹی شبیر احمد قائمخانی ،اقبال مقدم ،سابق ارکان اسمبلی جمال احمد اور انور رضا سمیت ذمہ داران و کارکنان سمیت خواتین بچوں کی بڑی تعداد موجود تھی۔ڈاکٹرمحمدفاروق ستار نے کہا کہ آج ہماری حب الوطنی پر انگلیاں اٹھائی جارہی ہیں،ہماری یکجہتی اور اتحاد پر لوگوں کو غلط فہمی لاحق ہوگئی ہے، شاید کچھ لوگ NA-246کی بدترین شکست بھول گئے ہیں انہیں یاد دلادوں جب جب الیکشن ہونگے تو NA-246ہی یاد دلاتے رہیں گے۔انہوں نے کہا کہ اللہ تعالیٰ جسے چاہتا ہے استعفیٰ میں بھی عزت دیتا ہے اور جسے چاہتا ہے استعفیٰ میں بھی ذلت دیتا ہے، قائدتحریک الطاف حسین نے 14اگست سے پہلے پاکستان کے جمہوری نظام جو ناانصافی سے بھرا ہوا ہے اس نظام کو بچانے کے لئے سوچا پارلیمان کو پہلے آزادکرایا جائے۔انہوں نے کہا کہ ہم جب بھی پارلیمان جائیں گے تو سراٹھاکر جائیں گے اگر پارلیمان سے آئینگے تو سر اٹھا کر آئینگے اور قائد اعظم محمد علی جناحؒ کے پاکستان کو سرنگوں نہیں ہونے دینگے۔اس موقع پر رکن رابطہ کمیٹی شبیر احمد قائم خانی نے کہا کہ آج میں جناب الطاف حسین کی جانب سے پوری قوم کو دل کی گہرائیوں سے پاکستان کا 68واں یوم آزادی کی مبارکباد پیش کرتا ہوں ۔تقریب کے اختتام پر قومی ترانا لگایا گیا اور آتش بازی کا زبر دست مظاہرہ کیا گیا جس سے لوگوں میں جوش و خروش دیکھنے میں آیا۔