لیاری، ملیر اور اورنگی ٹاؤن میں رینجرز اور سادہ لباس پولیس اہلکاروں کے ایم کیوایم کے کارکنان کے گھروں پر غیرقانونی چھاپوں اور گرفتاریوں پر ایم کیوایم رابطہ کمیٹی کا اظہار مذمت

کراچی ۔۔۔۔9اگست2015ء

متحدہ قومی موومنٹ کی رابطہ کمیٹی نے لیاری ، ملیراور اورنگی ٹاؤن میں رینجرز اور سادہ لباس پولیس اہلکاروں کے ایم کیوایم کے کارکنان کے گھروں پرغیر قانونی چھاپوں اور 5کارکنان کی بلاجواز گرفتاریوں کی سخت ترین الفاظ میں مذمت کی ہے اورمستقل چھاپہ مار کاروائیوں اور کارکنان کی بلاجواز گرفتاریوں کو ٹارگٹڈ آپریشن کی آڑ میں ایم کیوایم سیاسی ، جمہوری اور انسانی حقوق کی سنگین پامالی قرار دیا ہے ۔ایک بیان میں رابطہ کمیٹی نے کہاکہ مورخہ 8اگست کی شب رینجرز نے لیاری سیکٹر یونٹ 32کے کارکن محمد ناصر جب کہ سادہ لباس میں ملبوس پولیس اہلکاروں نے ایم کیوایم اورنگی ٹاؤن سیکٹر یونٹ 118-Cکے کارکن ظہیر الدین کو ان کی رہائشگاہوں پر چھاپہ مار کر گرفتار کرلیا ۔اسی طرح مورخہ 9اگست کی شب رینجرز نے ایم کیوایم ملیر سیکٹر یونٹ 102کے کارکنان وقار الدین ، محمد عارف خان اور ارشد کو بھی ان کے گھروں پر غیر قانونی چھاپے مار کرحراست لے لیا اور انہیں تشدد کا نشانہ بناتے ہوئے اپنے ہمراہ لے گئے ۔ رابطہ کمیٹی نے کہاکہ کراچی ٹارگٹڈ آپریشن کے نام پر جرائم پیشہ عناصر اور دہشت گرد عناصر کو تو تحفظ حاصل ہے اور وہ قانون کی گرفت سے نہ صرف محفوظ ہیں بلکہ عوام کی جان و مال سے کھیل رہے ہیں لیکن دوسری جانب ایم کیوایم جیسی پرامن ، جمہوری ، سیاسی اور محب وطن جمہوری جماعت کے کارکنان اور ہمدردوں کو اس آپریشن کی آڑ میں نہ صرف غیر قانونی طور پر گرفتار کیاجارہا ہے بلکہ انہیں سرکاری حراست میں بہیمانہ تشدد کا نشانہ بناکر مختلف جرائم میں ملوث کیاجارہا ہے جس کی جتنی بھی مذمت کی جائے کم ہے ۔ رابطہ کمیٹی نے مزید کہاکہ ایم کیوایم کے ذمہ دارا ن وکا رکنان کو گرفتاریوں کے بعد 90روز حراست میں رکھنا یا ان کی حراست سے انکار کرنا اب معمول کا حصہ بن چکا ہے جو اس بات کا کھلا ثبوت ہے کہ ایم کیوایم کو سیاسی انتقام کا نشانہ بنایاجارہا ہے اور اس کے معصوم و بے گناہ کارکنان و ہمدردوں کے بنیادی انسانی حقوق کو پیروں تلے روندھا جارہا ہے اور عدالت احکامات ، آئین وقانون کی دھجیاں اڑائی جارہی ہے ۔ رابطہ کمیٹی نے وزیراعظم پاکستان نواز شریف ، وفاقی وزیر داخلہ چوہدری نثار علی خان اور وزیراعلیٰ سندھ سید قائم علی شاہ سے مطالبہ کیا کہ رینجرز اور سادہ لباس میں ملبوس پولیس اہلکاروں کے ہاتھوں لیاری ، ملیر اور اور نگی ٹاؤن سے ایم کیوایم کے 5بے گناہ کارکنان کی گرفتاریوں کا نوٹس لیاجائے ،غیر قانونی چھاپے وگرفتاریوں کا سلسلہ بند کرایاجائے اور گرفتار شدگان کو فی الفور رہا کیا جائے۔