کراچی میں ایم کیوایم کے خلاف ریاستی جبر و تشدد ، لاقانونیت ، غیر قانونی چھاپوں ، ماورائے عدالت قتال اور گرفتاریوں کے بعد کارکنان کو لاپتہ کئے جانے کے واقعات کے خلاف ڈیلاس میں ایم کیوایم کا زبردست احتجاجی مظاہر ہ

ڈیلاس ۔۔۔8 اگست2015ء 

ایم کیوایم امریکہ کے زیر اہتمام کراچی میں ایم کیوایم کے خلاف ریاستی جبر و تشدد ، لاقانونیت ، غیر قانونی چھاپوں ، ماورائے عدالت قتال اور گرفتاریوں کے بعد کارکنان کو لاپتہ کئے جانے کے واقعات کے خلاف ڈیلاس میں زبردست احتجاجی مظاہر کیا گیا جس میں ایم کیوایم کے سینئر ڈپٹی کنوینر ندیم نصرت ، رکن رابطہ کمیٹی واسع جلیل ، حق پرست سینٹر خوش بخت شجاعت ، اراکین صوبائی اسمبلی ارم عظیم فاروقی ، عدنان احمد ، ایم کیوایم امریکہ کے سینٹرل آرگنائزر جنید فہمی ، جوائنٹ سینیٹرل آرگنائزر محمد ارشد حسین سمیت ڈیلاس میں مقیم پاکستانی کمیونٹی کی بڑی تعداد بشمول خواتین اوربچوں نے شرکت کی ۔ احتجاجی مظاہرین نے ایم کیوایم اور اردو بولنے والے والی کمیونٹی کے خلاف بد ترین ریاستی آپریشن کے خلاف شدید غم و غصہ کی لہر دیکھنے میں آئی اس موقع پر ان کا کہنا تھا کہ ماضی میں بھی بانیان پاکستان کی اولادوں کو بد ترین ریاستی دہشت گردی کا نشانہ بنا کر ہزاروں کارکنوں کو شہید کیا گیا اور اب پھر جرائم پیشہ عناصر کے خلاف آپریشن کے نام پر اردو بولنے والی کمیونٹی اور ان کی نمائندہ جماعت ایم کیوایم کو دیوار سے لگایاجارہا ہے ۔ ان کا کہنا تھا کہ ایم کیوایم کے خلاف جبر وتشدد کا یہ عمل استحکام پاکستان اور اس کی وحدت کے خلاف ہے ۔ مظاہرے کے شرکاء نے اپنے ہاتھوں میں پلے کارڈ اٹھا رکھے تھے جس پر ریاستی دہشت گردی ، بلاجواز غیر قانونی گرفتاریوں ، چھاپوں اور ماورائے عدالت قتل کے خلاف نعرے اور مطالبات درج تھے ۔