الطاف حسین پر جھوٹے الزامات لگانے والے جاوید ہاشمی خود سب سے بڑے ملک دشمن ہیں، قاسم علی رضا
جاوید ہاشمی صاحب کو جناب الطاف حسین پر بہتان تراشی سے قبل شرم کرنی چاہیے، قاسم علی رضا
جاوید ہاشمی نے پی ٹی وی کی عمارت پر حملہ کرنے پرعمران خان کے خلاف غداری کامقدمہ قائم کرنے کا مطالبہ کیوں نہیں کیا؟
جناب الطاف حسین کی وضاحت کے باوجود ان پر بھارت سے مدد مانگنے کا بے بنیاد اور جھوٹا الزام لگاکر عوام کو گمراہ کیاجارہا ہے
جاوید ہاشمی صاحب کوتعصب کی عینک اتار کا حقائق کا مشاہدہ کرنا چاہیے اور دوعملی سے گریز کرناچاہیے، قاسم علی رضا
لندن ۔۔۔5، اگست2015ء
متحدہ قومی موومنٹ کی رابطہ کمیٹی کے رکن قاسم علی رضا نے سینئر سیاستی رہنما جاوید ہاشمی کے بیان کی شدید مذمت کرتے ہوئے کہاہے کہ جناب الطاف حسین پر جھوٹے الزامات لگانے والے خود سب سے بڑے ملک دشمن ہیں۔ ایک بیان میں قاسم علی رضا نے کہاکہ جاوید ہاشمی صاحب کو جناب الطاف حسین پر بہتان تراشی سے قبل شرم کرنی چاہیے ۔ جناب الطاف حسین کی اس وضاحت کہ ’’میں نے اپنے خطاب میں بھارتی فوج یابھارتی حکومت سے مہاجروں کو ظلم وستم سے بچانے کا مطالبہ سرے سے کیا ہی نہیں ‘‘ کے باوجود جو عناصران پر بھارت سے مدد مانگنے کا بے بنیاد اور جھوٹا الزام لگارہے ہیں اور عوام کو گمراہ کررہے ہیں دراصل وہی ملک اور قوم کے سب سے بڑے دشمن ہیں ۔ انہوں نے کہاکہ جاوید ہاشمی کی جماعت تحریک انصاف نے اسلام آباد میں دھرنے کے دوران پاکستان ٹیلی ویژن اورپارلیمنٹ پر حملہ کیا لیکن اس وقت جاوید ہاشمی صاحب کی حب الوطنی خواب خرگوش کے مزے لوٹ رہی تھی،قوم جاننا چاہتی ہے کہ انہوں نے ان قومی تنصیبات پر حملہ کرنے پرعمران خان کے خلاف غداری کامقدمہ قائم کرنے کا مطالبہ کیوں نہیں کیا۔ قاسم علی رضانے کہاکہ جاوید ہاشمی صاحب کو تعصب کی عینک اتار کا حقائق کا مشاہدہ کرنا چاہیے اور دوعملی سے گریز کرنا چاہیے۔