ایم کیوایم برطانیہ کے تحت لندن میں الطاف حسین سے اظہاریکجہتی کیلئے مظاہرہ
مظاہرے میں رابطہ کمیٹی کے ارکان ،مقامی ذمہ داروں ، بزرگوں ، خواتین ، نوجوانوں ، کمسن اور شیرخوار بچوں کی بڑی تعداد نے شرکت کی
مظاہرین نے ایم کیوایم کے پرچم ، الطاف حسین کی تصاویر اور مختلف پلے کارڈز اٹھا رکھے تھے
لندن کی فضائیں مظاہرین کے فلک شگاف نعروں سے گونجتی رہیں
الطاف حسین کی سیاسی جدوجہداور ایم کیوایم کے خلاف مظالم کی تفصیلات پر مبنی ہینڈ بلز بھی تقسیم کیے گئے
لندن۔۔۔25، جولائی2015ء
متحدہ قومی موومنٹ برطانیہ یونٹ کے تحت لندن کے علاقے ایجوئیر میں قائد تحریک جناب الطاف حسین سے اظہاریکجہتی کیلئے مظاہرہ کیا گیا جس میں ایم کیوایم رابطہ کمیٹی کے ارکان، برطانیہ کے مختلف یونٹوں کے ذمہ داران ، کارکنان اور ان کے اہل خانہ کے علاوہ ایم کیوایم برطانیہ شعبہ خواتین کی کارکنان نے شرکت کی۔ مظاہرے میں بزرگوں ، خواتین ، نوجوانوں ، کمسن اور شیرخوار بچوں کی بڑی تعداد بھی شامل تھی۔ مظاہرے کے شرکاء نے اپنے ہاتھوں میں ایم کیوایم کے پرچم ، جناب الطاف حسین کی تصاویر اور مختلف پلے کارڈز اٹھارکھے تھے جن پر جناب الطاف حسین سے اظہاریکجہتی اور عقیدت ومحبت پرمبنی کلمات اور نعرے تحریر تھے ۔ بعض پلے کارڈز پر ایم کیوایم کے کارکنان کے ماورائے عدالت قتل ، رہنماؤں اورکارکنوں کی غیرقانونی گرفتاریوں اور ایم کیوایم پر ڈھائے جانے والے مظالم کے خلاف نعرے بھی تحریرتھے۔مظاہرے کے بعض شرکاء نے تحریک انصاف کے سربراہ عمران خان کی بغیرنکاح سے پیدا ہونے والی بچی ٹیریان کو انصاف دینے کے مطالبے اور عمران خان کے خلاف نعروں پر مبنی پلے کارڈ بھی اٹھارکھے تھے ۔ اس موقع پر لندن کی فضائیں مظاہرین کے فلک شگاف نعروں سے گونجتی رہیں۔ مظاہرین، ایم کیوایم اور جناب الطاف حسین کے حق میں پرجوش نعرے لگاتے رہے اوراپنی والہانہ عقیدت ومحبت کااظہارکرتے رہے جس کا سلسلہ کئی گھنٹوں تک جاری رہا ۔مظاہرے کے دوران ایم کیوایم کے کارکنان نے راہگیروں کو جناب الطاف حسین کی سیاسی جدوجہداور ایم کیوایم کے خلاف سرکاری سطح پر ڈھائے جانے والے مظالم کی تفصیلات پر مبنی ہینڈ بلز بھی تقسیم کیے ۔
تصاویر