علی رضاعابدی کے ریسٹورنٹ کے چھاپے اوروہاں سے جرائم پیشہ شخص کی گرفتاری کا دعویٰ سراسرجھوٹ ،بے بنیاد، خودساختہ اور عوام کو گمراہ کرنے کی بھونڈی کوشش ہے ۔ ایم کیوایم

کراچی۔۔۔24،جولائی2015ء

متحدہ قومی موومنٹ کے ترجمان نے ایم کیوایم کے رکن قومی اسمبلی علی رضاعابدی کے ریسٹورنٹ پر چھاپے اوروہاں سے جرائم پیشہ شخص کی گرفتاری کے دعوے کوسراسرجھوٹ ،بے بنیاد اور عوام کو گمراہ کرنے کی بھونڈی کوشش قراردیا ہے ۔ ایک بیان میں ترجمان نے کہاکہ ریسٹورینٹ پرچھاپے کا ڈرامہ یہ ہے کہ عینی شاہدین کے مطابق چھ پشتوزبان بولنے والے نوجوانوں نے رات کو ریسٹورینٹ میں آکر کھاناآرڈرکیا۔جیسے ہی انہوں نے آرڈرکیااس کے چند منٹ بعدہی رینجرزنے ریسٹورنٹ کے ڈائنگ ہال میں چھاپہ مارااوران نوجوانوں کے منہ پر کپڑاڈال کرلے گئی ۔اگررینجرزکے چھاپے کامقصدصرف ان افرادکی گرفتاری ہوتاتوانہیں لے جایا جاتا لیکن رینجرزنے چھاپے کے دوران ریسٹورینٹ کے ملازمین کوکچن میں بندکردیا اورعلی رضا عابدی کے کزن اورریسٹورنٹ کے مینیجر حسن رضا کو بھی حراست میں لے لیا۔اس کے ساتھ ساتھ رینجرزکے اہلکار ریسٹورینٹ کے کمپیوٹرز، اہم کاغذات اور سیکوریٹی کیمرے کی ریکارڈنگ بھی اٹھاکرلے گئے ۔ ترجمان نے کہاکہ عینی شاہدین کے مطابق رینجرزنے ریسٹورنٹ سے علی رضا عابدی کے کزن حسن رضاسمیت سات افرادکوحراست میں لیاجن میں سے حسن رضاکوبعدازاں رہاکردیاگیا لیکن رینجرزنے آج صرف ایک شخص کی گرفتاری کادعویٰ کیاہے ۔ سوال یہ ہے کہ باقی افرادکہاں گئے ؟ ان کے بارے میں رینجرزنے عوام کوکیوں نہیں بتایاکہ وہ کون تھے اورانکی تفصیل کیاہے؟اس سے صاف ظاہرہے کہ ریسٹورینٹ میں آکربیٹھنے والے وہ افرادبھی رینجرزکے بھیجے گئے افرادتھے جن کی گرفتاری کاڈرامہ رچایاگیا۔ ترجمان نے کہاکہ رینجرز کی جانب سے جس یامین کوریسٹورنٹ سے گرفتارکرنے کادعویٰ کیاجارہا ہے، اگر رینجرزکی اس کہانی کودرست مان لیاجائے کہ انہیں یامین مطلوب تھااوراسے ریسٹورینٹ سے ہی گرفتار کیاگیاہے توپھر ریسٹورینٹ کے کمپیوٹرز ، اہم کاغذات اور سیکوریٹی کیمرے کی ریکارڈنگ کوکیوں تحویل میں لیاگیا؟ علی رضا عابدی کے کزن حسن رضاکوکیوں گرفتار کیا گیا ؟ ان کے ریسٹورینٹ کوسیل کیوں کیاگیا؟اس ساری صورتحال سے صاف ظاہرہے کہ رینجرزکی جانب سے اس چھاپے اوروہاں سے گرفتاری کے بارے میں پیش کی گئی کہانی سراسرجھوٹی ،من گھڑت اورخودساختہ ہے اوررینجرزکی اس پوری کارروائی کااصل مقصدریسٹورینٹ سے کسی شخص کی گرفتاری نہیں بلکہ ایم کیوایم کے رکن قومی اسمبلی علی رضاعابدی کوانتقام کانشانہ بناناہے کیونکہ علی رضاعابدی گزشتہ کئی دنوں سے ٹی وی چینلز اورسوشل میڈیاپر ایم کیوایم پر ڈھائے جانے والے مظالم کے خلاف کھل کرآوازاحتجاج بلندکررہے ہیں اورانہوں نے عمران خان کے خلاف ایف آئی آربھی درج کرائی ہے اورعلی رضاعابدی کواسی بات کی سزا دی جارہی ہے،اس قسم کے ہتھکنڈے استعمال کرکے ایم کیوایم کے منتخب نمائندوں کو ہراساں کرنے اور انہیں معاشی طورپر نقصان پہنچانے کا عمل کیاجارہا ہے ۔ ترجمان نے کہاکہ اس طرح کے ہتھکنڈوں کے ذریعے نہ توعو ام کی آنکھوں میں دھول جھو نکی جاسکتی ہے اورنہ ہی حق پرست عوامی نمائندوں کوخوفزدہ کیاجاسکتا ہے ۔