ایم کیو ایم محب وطن جماعت ہے ، ماضی کی طرح آج بھی جھوٹے الزامات لگائے جارہے ہیں ،وسیم اختر

کراچی ۔۔۔10جولائی 2015ء

متحدہ قومی موومنٹ کی رابطہ کمیٹی کے رکن وسیم اختر نے کہا ہے کہ ایم کیو ایم پر ماضی کی طرح آج بھی الزامات لگائے جارہے ہیں ، ایم کیو ایم نے ہمیشہ وسیع تر قومی مفاد میں حکومتو ں کا ساتھ دیا لیکن ہمیں اختیارات نہیں ملے۔انہوں نے کہا کہ خدمت خلق فاؤنڈیشن گزشتہ کئی دہائیوں سے رمضان المبارک میں فطرہ ،زکوۃ جمع کرتی آرہی ہے جس رقم سے فلاحی کام اور مصیبت میں گھرے ہم وطنوں کی بے لوث خدمت کی جاتی ہے ۔ان خیالات کا اظہار انہوں نے ڈیفنس کلفٹن ریزیڈنٹ سوسائٹی کے زیر اہتمام منعقدہ افطار ڈنر سے خطاب کرتے ہوئے کیا ۔ وسیم اختر نے کہا کہ خدمت خلق فاؤنڈیشن ملک میں ایدھی کے بعد سب سے بڑی ایمبولینس سروس کا حامل ادارہ ہے اور ملک کے مختلف حصوں میں خدمت خلق فاؤنڈیشن کے اسپتال ، لیبارٹریز، بلڈبینک ، سرد خانے اور میت بسیں عوامی خدمت کر رہی ہیں۔انہوں نے کہا کہ آج ایم کیو ایم کے عوامی فلاح کے کاموں پر غیر اعلانیہ پابندی لگادی گئی ہے ،ایم کیو ایم محب وطن جماعت ہے جس نے کبھی کسی غیر ملکی قوت کی مدد نہیں لی لیکن ہمارے کارکنان پر بے بنیاد الزامات لگائے جارہے ہیں ۔افطار ڈنر میں ڈی سی آر سی کے اراکین ،نامور قانوندان خواجہ نوید سمیت ڈیفنس کلفٹن کے عوام نے شرکت کی۔ اس موقع پر وسیم اختر نے ڈیفنس کلفٹن میں مقیم مخیر حضرات سے اپیل کی کہ وہ خدمت خلق فاؤنڈیشن کی فلاحی سرگرمیوں کو جاری رکھنے میں ہماری مدد کریں اور زیادہ سے زیادہ تعداد میں اپنافطرہ ، زکوۃ ، عطیات اور امدادی رقوم خدمت خلق فاؤنڈیشن کے مرکز ی دفتر، ایم کیوایم کے مرکز نائن زیرو عزیز آباد اور مسلم کمرشل بنک واٹر پمپ برانچ کے اکاؤنٹ نمبر0431390931000816،برانچ کوڈ 0073یا رضاکاران کو جمع کروائیں ۔اس موقع پر ڈی سی آرسی کے صدرو سابق حق پرست رکن سندھ اسمبلی اختر بلگرامی نے وسیم اختر و دیگر کا افطار ڈنر میں شرکت پر تہہ دل سے شکریہ ادا کیا۔