خدمت خلق فاؤنڈیشن کی جانب سے رمضان المبارک میں فطرہ ، زکوۃ اور عطیات جمع کرنے کیلئے کراچی کے 15مختلف مقامات پر کلیکشن سینٹرز قائم کردئیے گئے،ترجمان خدمت خلق فاؤنڈیشن

کراچی ۔۔۔7جولائی2015ء

ایم کیو ایم کے فلاحی ادارے خدمت خلق فاؤنڈیشن کے زیر اہتمام گزشتہ برسوں کی طرح امسال بھی رمضان المبارک میں فطرہ، زکوۃ اور عطیات جمع کرنے کیلئے کراچی کے 15مختلف مقامات پر کلیکشن سینٹرز قائم کئے گئے ہیں جہاں شہری اپنی سہولت کے مطابق فطرہ ، زکوۃ ، عطیات اور امدادی رقوم باآسانی جمع کرواسکتے ہیں۔اس سلسلے میں خدمت خلق فاؤنڈیشن کی جانب سے ایف بی ایریا میں واقع نذیر حسین میڈیکل کمپلیکس ، پاک کالونی اور اورنگ آباد میں قائم خورشید بیگم میڈیکل سینٹر کی دو مختلف برانچوں،خدا کی بستی سنیٹری ہوم،عباسی شہید اسپتال میں کے کے ایف بلڈ بینک، سوبھراج اسپتال میں کے کے ایف بلڈ بینک،کراچی انسٹیٹیوٹ آف ہارٹ ڈزیز میں کے کے ایف لیبارٹری،KIHDمیں کے کے ایف فارمیسی،کارڈیک ایمرجنسی سینٹر لانڈھی،لانڈھی میڈیکل کمپلیکس میں کے کے ایف لیبارٹری،نیو کراچی ، لانڈھی ، ملیر ، اورنگی میں قائم خد مت خلق فاؤنڈیشن کے سردخانوں اور خورشید بیگم سیکریٹریٹ عزیز آباد سے متصل خورشید بیگم میڈیکل سینٹر میں فطرہ اور زکوۃ کلیکشن سینٹرز قائم کئے گئے ہیں جہاں 24گھنٹے عوام اپنی امدادی رقوم جمع کرواسکتے ہیں۔

واضح رہے کہ خدمت خلق فاؤنڈیشن گزشتہ کئی دہائیوں سے ملک کے غرباء ، مساکین ، مستحقین ، بیواؤں، یتیموں اور بے سہارا خاندانوں کی امداد کر رہاہے جبکہ کراچی ، حیدرآباد ، سکھر ، میر پورخاص، اندرون سندھ ، بلوچستان ، صوبہ پنجاب ، خیبر پختونخوا ، آزاد کشمیر اور گلگت بلتستا ن میں خدمت خلق فاؤنڈیشن کی ایمبولینس سروس، میت بس سروس، سردخانے ، بلڈ بینکس، لیبارٹری سروسز جاری ہیں جبکہ ملک و بیرون ملک آنیوالی قدرتی آفات، طوفان ،سیلاب ، زلزلوں میں عوام کی بلا امتیاز خدمت اور فلاحی سرگرمیاں بھی عوامی عطیات سے جاری ہیں ۔