قائد ایم کیوایم الطاف حسین کی جانب سے عبدالمالک کیلئے مٹھائی کےدوعدد ٹوکرے ، گلدستہ اور 25 ہزارروپے نقد انعام دینے کا اعلان
عبدالمالک نے امریکہ میں مسل مینیا کے مقابلے میں گولڈ میڈل حاصل کرکے پاکستان کا نام روشن کیا ہے، الطاف حسین
عبدالمالک انتہائی غریب گھرانے سے تعلق رکھتے ہیں اور خواتین کے پرس فروخت کرکے اپنے اہل خانہ کی کفالت کرتے ہیں، الطاف حسین
مخیر حضرات عبدالمالک جیسے باہمت نوجوانوں کی بھرپور مالی معاونت کریں ، الطاف حسین
عبدالمالک آج بروز بدھ 6 بجے اتحاد ائیرلائن کی پرواز سے کراچی ائیرپورٹ پہنچ رہے ہیں ،الطاف حسین
رابطہ کمیٹی ، مقامی سیکٹرکے کارکنان اورہمدرد عبدالمالک کا شاندار استقبال کرکےانہیں زبردست خراج تحسین پیش کریں، الطاف حسین
لندن۔۔۔24، جون2015ء
متحدہ قومی موومنٹ کے قائد جناب الطاف حسین نے کہاہے کہ کراچی کے نوجوان عبدالمالک نے امریکہ میں مسل مینیا کے مقابلے میں گولڈ میڈل حاصل کرکے پاکستان کا نام روشن کیا ہے اورمخیرحضرات کو ان جیسے باہمت نوجوانوں کی حوصلہ افزائی کرنی چاہیے۔ ایک بیان میں جناب الطاف حسین نے کیلی فورنیا میں ہونے والے مسل مینیا کے مقابلے میں کراچی کے نوجوان عبدالمالک کی شاندار کامیابی اور مقابلے میں گولڈ میڈل حاصل کرنے پر عبدالمالک اور ان کے گھروالوں کو زبردست مبارکباد پیش کی،انہوں نے شاندارکامیابی پر عبدالمالک کو مٹھائی کے دوعدد ٹوکرے ، گلدستہ اور 25 ہزارروپے نقد انعام دینے کابھی اعلان کیا ۔جناب الطاف حسین نے کہاکہ عبدالمالک آج بروز بدھ 6 بجے اتحاد ائیرلائن کی پرواز سے کراچی ائیرپورٹ پہنچ رہے ہیں ، عبدالمالک انتہائی غریب گھرانے سے تعلق رکھتے ہیں اور خواتین کے پرس فروخت کرکے اپنے اہل خانہ کی کفالت کرتے ہیں ۔ جناب الطاف حسین نے تمام مخیر حضرات سے اپیل کی کہ وہ عبدالمالک جیسے باہمت نوجوانوں کی بھرپور مالی معاونت کریں تاکہ وہ پاکستان کا نام مزید روشن کرنے کیلئے اپنی صلاحیتوں کا بہتر طور پر استعمال کرسکیں۔ جناب الطاف حسین نے ایم کیوایم کی رابطہ کمیٹی کے ارکان ، مقامی سیکٹرکے کارکنان اورہمدرد ماؤں ، بہنوں ، بزرگوں سے اپیل کی کہ وہ عبدالمالک کا شاندار استقبال کرکے انہیں زبردست خراج تحسین پیش کریں اوران کی حوصلہ افزائی کریں۔